روس نے مزید 50 برطانوی سفارتکاروں کو ملک بدر کر دیا

تصویر کے کاپی رائٹ AFP

برطانیہ میں ایک سابق روسی جاسوس اور ان کی بیٹی کو زہر دیے جانے کے بعد روس اور برطانیہ کے تعلقات کشیدہ ہو گئے ہیں اور ہفتے کو ماسکو نے روس میں 50 مزید برطانوی سفارتکاروں کو ملک سے نکل جانے کا حکم دیا ہے۔

برطانیہ کی جانب سے روس کے 23 سفارتکاروں کو ملک بدر کیے جانے کے بعد روس نے بھی 23 برطانوی سفارتکاروں کو ملک سے نکل جانے کا حکم دیا تھا۔

روس کا جوابی اقدام، 60 امریکی سفارتکار ملک بدر

23 روسی سفارت کاروں کو ایک ہفتے میں برطانیہ چھوڑنے کا حکم

تاہم اب روس کا اصرار ہے کہ مزید 50 برطانوی سفارتکاروں کو ملک سے نکل جانے کا حکم دیا ہے۔

روس کا کہنا ہے کہ برطانیہ اور روس کے ایک دوسرے کے ملک میں سفارتکاروں کی تعداد یکساں ہونی چاہیے۔

بی بی سی کے پال ایڈمز کا کہنا ہے کہ سفارتکاروں کی یکساں تعداد کا مطلب ہے کہ کم از کم 27 مزید برطانوی سفارتکاروں کو ملک بدر کیا جا سکتا ہے۔

برطانیہ کے علاقے سیلیسبری میں سابق روسی جاسوس اور ان کی بیٹی کو زہر دیا گیا تھا جس کا الزام برطانیہ نے روس پر لگایا تھا۔ تاہم روس اس الزام کی تردید کرتا آیا ہے۔

جمعہ کے روز ماسکو میں برطانوی سفیر لوری برسٹو کو مطلع کیا گیا کہ برطانیہ کے پاس ایک ماہ ہے جس میں برطانوی سفارتکاروں کی تعداد برطانیہ میں روسی سفارتکاروں کی تعداد کے برابر کریں۔

تصویر کے کاپی رائٹ EPA/ Yulia Skripal/Facebook

ہفتے کے روز روسی وزارت خارجہ کی ترجمان ماریا نے روئٹرز کو بتایا کہ اس کا مطلب ہے کہ برطانیہ کو 50 سے کچھ زیادہ برطانوی سفارتکاروں کو ملک واپس بلانا ہو گا۔

دوسری جانب برطانوی دفتر خارجہ کی ترجمان نے کہا کہ روسی جواب مایوس کن ہے لیکن ماضی میں روسی رویے کو دیکھتے ہوئے یہ روسی قدم متوقع تھا۔

دریں اثنا جمعہ کو ہیتھرو ایئرپورٹ پر روسی ایئر لائن ایرو فلوٹ کے مسافروں کی مبینہ تلاشی پر روسی وزارت برائے ٹرانسپورٹ نے برطانیہ سے باضابطہ وضاحت مانگی ہے۔

’اگر اس حوالے سے کوئی وضاحت نہیں ہے تو برطانیہ کی اس کارروائی کو روس غیر قانونی تصور کرے گا اور روس کو یہ حق حاصل ہو گا کہ وہ بھی برٹش ایئر ویز کے مسافروں کے ساتھ ایسا ہی برتاؤ کرے۔‘

برطانیہ نے ابھی تک روسی جہاز کے مسافروں کی تلاشی کی تصدیق نہیں کی ہے۔

ملک کتنے سفارتکار نکالے ملک کتنے سفارتکار نکالے
1 برطانیہ 23 9 اٹلی 2
2 امریکہ 60 10 لیتوئینیا 3
3 کروئیشیا 1 11 چیک ریپبلک 3
4 کینیڈا 4 12 نیدرلینڈ 2
5 جرمنی 4 13 ڈنمارک 2
6 فرانس 4 14 لیٹویا 1
7 فن لینڈ 1 15 ایسٹونیا 1
8 پولینڈ 4 16 یوکرین 13

متعلقہ عنوانات

اسی بارے میں