شمالی کوریا کا سالانہ پریڈ میں بیلسٹک میزائلوں کی نمائش سے گریز

پریڈ

،تصویر کا ذریعہAFP/GETTY

شمالی کوریا نے اپنے 70 سالہ جشن کے دوران منعقدہ فوجی پریڈ میں اپنی بین البراعظمی بیلسٹک میزائل کی نمائش نہیں کی۔

یہ اطلاع شمالی کوریا سے موصول ہونے والی رپورٹوں سے سامنے آئی ہے۔ یہ بھی واضح نہیں ہے کہ شمالی کوریا کے رہنما کم جونگ ان نے اس موقعے پر قوم سے خطاب کیا یا نہیں۔

اس پریڈ کو شمالی کوریا کے اسلحے کے ذخائر کو جاننے اور ایٹمی اسلحے کے خاتمے کے عہد کے تناظر میں بغور دیکھا جا رہا ہے۔

بعض تجزیہ نگاروں کا خیال تھا کہ صدر ٹرمپ سے ملاقات کے بعد کم جونگ ان اس سالانہ پریڈ میں فوجی ساز و سامان کے مظاہرے میں احتیاط برتیں گے۔

شمالی کوریا سے امریکہ تک رسائی اور جوہری ہتھیار لے جانے کی اہلیت رکھنے والی بین البراعظمی بیلسٹک میزائلوں کی نمائش اس موقعے پر شاید اشتعال انگيزی سے تعبیر کی جاتی۔

پریڈ کی کوئی فوٹیج جاری نہیں کی گئی لیکن وہاں موجود خبر رساں ادارے اے ایف پی کے ایک نمائندے، اور این کے نیوز، جس کے پاس شمالی کوریا کے سرکاری ٹی وی کی تصاویر ہیں، دونوں کا کہنا ہے کہ پریڈ میں کسی بین البراعظمی بیلسٹک میزائل کی نمائش نہیں کی گئی۔

،تصویر کا ذریعہAFP/Getty

جون میں امریکی صدر ٹرمپ اور کم جونگ ان نے کوریا جزیرہ نما کو جوہری ہتھیاروں سے پاک کرنے کا مبہم سا معاہدہ کیا تھا لیکن اس کے لیے کوئی مدت مقرر نہیں گئی تھی، نہ ہی اس کے متعلق دیگر تفصیلات دی گئی تھیں۔

،تصویر کا ذریعہAFP

اس کے بعد دونوں ملکوں کے درمیان اعلیٰ سطح کے وفود کے دورے جاری رہے لیکن حال ہی میں امریکی وزیر خارجہ مائیک پومپیو کا شمالی کوریا کا دورہ آخری مرحلے پر منسوخ کر دیا گیا۔

اس کے بعد دونوں ممالک نے ایک دوسرے پر بات چیت کو معطل کرنے کا الزام لگایا ہے تاہم یہ بھی کہا ہے کہ وہ اس ضمن میں پیش رفت جاری رکھنے کے پابند ہیں۔

،تصویر کا ذریعہAFP/GETTY

سیول میں بی بی سی کی نامہ نگار لورا بیکر نے کہا کہ بین البراعظمی بیلسٹک میزائلوں کی نمائش سے بات چیت کا مستقبل اور کوریائی جنگ کے خاتمے کا اعلان مشکل میں پڑ جاتا۔

شمالی کوریا پانچ سالوں میں پہلی بار عوامی کھیلوں کا انعقاد کر رہا ہے۔ 'اریرانگ ماس گیمز' شمالی کوریا کا وسیع پیمانے پر کیے جانے والے پروپیگنڈے کا رنگا رنگ منظر پیش کرتی ہیں۔

،تصویر کا ذریعہAFP/GETTY

رواں سال کے کھیلوں میں شمالی کوریا کی علامتی تاریخ پیش کی جا رہی ہے جس کا عنوان 'شاندار ملک' رکھا گیا ہے۔

،تصویر کا ذریعہAFP/GETTY

،تصویر کا کیپشن

شمالی کوریا کی 70 ویں سالگرہ منانے کے لیے 70 جیٹ جہازوں نے ایک ساتھ پرواز کی

گذشتہ دو ہفتوں کے دوران سیٹلائٹ سے لی جانے والی تصاویر سے یہ ظاہر ہوتا ہے کہ رواں سال کے کھیل، جو ستمبر بھر جاری رہیں گے، بہت بڑے پیمانے پر منعقد ہو رہے ہیں۔

گذشتہ منعقدہ کھیلوں میں بڑے بڑے سٹیڈیم سنکرونائزڈ جمناسٹس اور گروپ ڈانس کے مظاہروں سے بھرے نظر آئے تھے۔

،تصویر کا ذریعہAFP/GETTY

ان کھیلوں کی رنگارنگ تقاریب بہت دلکش نظر آتی ہے، لیکن اقوام متحدہ کا کہنا ہے کہ بچوں کو اس میں شرکت کرنے کے لیے مجبور کیا جاتا ہے۔