فرانس: چاقو کے حملے میں سات افراد زخمی

پیرس حملہ تصویر کے کاپی رائٹ Reuters
Image caption پیرس میں ہونے والے حملے کے شواہد کو نشان زد کر دیا گیا ہے

فرانس کے دارالحکومت پیرس میں پولیس نے بتایا ہے کہ چاقو اور لوہے کے سریے سے لیس ایک شخص نے حملے میں سات افراد کو زخمی کر دیا ہے جن میں سے چار شدید طور پر زخمی ہوئے ہیں۔

حملہ آور کی شناخت افغانستان کے باشندے کے طور پر کی جا رہی اور اسے حراست میں لے لیا گیا ہے۔

اطلاعات میں بتایا گیا ہے کہ اس کے دہشت گردانہ حملہ ہونے کے شواہد نہیں ملے ہیں۔

بہت سی خبروں میں بتایا گیا ہے زخمیوں میں دو برطانوی سیاح بھی شامل ہیں۔

یہ بھی پڑھیے

فرانس: مارسیے میں چاقو بردار کا حملہ، دو ہلاک

’پیرس حملہ آور چیچنیا میں پیدا ہوا تھا‘

یہ حملہ فرانسیسی دارالحکومت کے شمال مشرقی 19 ویں ضلعے میں ایک نہر کے کنارے مقامی وقت کے مطابق رات 11 بجے ہوا۔

اطلاعات میں بتایا گیا ہے کہ حملہ آور نے انجان لوگوں کو نشانہ بنایا اور پہلے پہل دو مرد اور ایک خاتون کو کوائی دا لور میں ایم کے2 سینیما کے قریب نہر کے کنارے چاقو مارا۔

تصویر کے کاپی رائٹ Reuters
Image caption حملے کے بعد پولیس نے اس علاقے کو گھیرے میں لے لیا ہے

بہت سے لوگ جو اس وقت وہاں 'پیٹینکا' کھیل رہے تھے انھوں نے حملہ آور پر گیند ماری تاکہ وہ انھیں روک سکے۔

پیٹینکا ایک فرانسیسی کھیل ہے جس میں سٹیل کی اندر سے خالی بڑی گیند کو لکڑی کی چھوٹی گیند کے نزدیک تر پہنچانا ہوتا ہے۔

اطلاعات میں بتایا گیا کہ جب حملہ آور کو گیند لگی تو اس نے وہاں سے راہ فرار اختیار کی۔ اس کے بعد اس نے کوچہ ہنری نوگریس پر مبینہ طور پر دو برطانوی سیاحوں پر حلمہ کر دیا۔

برطانوی وزرات خارجہ کے دفتر نے ایک بیان میں کہا: 'ہم فوری طرح پر اس واقعے کی تفتیش کر رہے ہیں اور ہم فرانسیسی حکام سے رابطے میں ہیں۔'

فرانسیسی پولیس ذرائع نے بتایا: 'ابھی ایسا کوئی اشارہ نہیں ملا ہے جس سے یہ طے کیا جا سکے کہ یہ کوئی دہشت گردانہ حملہ تھا۔'

متعلقہ عنوانات

اسی بارے میں