زعفران: یونان کا ’سرخ سونا‘ جس کی سالانہ پیداوار چار ٹن ہے

یونانی زعفران تصویر کے کاپی رائٹ Reuters

زعفران ایک نایاب مصالحہ ہے جسے عام طور پر ’سرخ سونا‘ بھی کہا جاتا ہے۔ بے روز گاری کے مسئلے سے دوچار ملک یونان میں اب بہت سارے لوگوں کا روزگار اسی فصل سے منسلک ہے۔

چند سال پہلے یونان نے زعفران کی امریکہ برآمد شروع کی تھی اور اب کی نظریں چین پر ہیں۔

یونانی زعفران تصویر کے کاپی رائٹ Reuters

ہر سال موسم خزاں میں زیسس کائرو اپنے دفتر میں سول انجیئر کے طور پر کام کرنے کے بجائے شمالی یونان میں زعفران کے جامنی کھیتوں میں پھول چنتے پائے جاتے ہیں۔

یونان میں بہت سارے نوجوان شہریوں نے نو سال سے جاری معاشی بحران میں دیہی علاقوں کا رخ کیا اور کھیتی باڑی سے منسلک ہو گئے ہیں۔

یونانی زعفران تصویر کے کاپی رائٹ Reuters

34 سالہ زیسس کائرو نے خبررساں ادارے روئٹرز کو بتایا کہ ’بحران کے دوران اپنے شعبے میں ملازمت حاصل کرنا ایک مشکل کام تھا، خاص طور پر سول انجنیئرنگ کے شعبے میں جب کوئی تعمیرات ہی نہیں ہو رہی تھیں۔‘

سنہ 2012 میں وہ لندن سے یونان دو یونیورسٹی ڈگریوں کے ساتھ واپس لوٹے تھے۔ انھوں نے اپنے گاؤں کروکوس میں انجنیئرنگ کا دفتر کھولا تھا، لیکن ان کی آمد کا بڑا حصہ ان کی چار ایکڑ کی زمین سے آتا ہے۔

وہ کہتے ہیں کہ 'میں نے کبھی سوچا نہیں تھا کہ میں کبھی واپس آؤں گا۔ لیکن یہ ایک ایسا فیصلہ ہے جس پر مجھے کوئی پچھتاوا نہیں ہے۔'

یونانی زعفران تصویر کے کاپی رائٹ Reuters

یونانی کروکوس کے نواحی علاقوں میں تقریبا تین صدیوں سے زعفران کی کاشت کر رہے ہیں اور اس شہر کا نام بھی زعفران کے پھول 'کروکس' سے اخذ کیا گیا ہے۔ کہا جاتا ہے کہ سکندر اعظم کو جنگ میں آنے والے زخموں پر بطور مرہم بھی زعفران لگایا گیا تھا۔

یونانی زعفران تصویر کے کاپی رائٹ Reuters

یونان کی کوپرآٹیو آف سیفرون کے سربراہ نیکوس پٹسیورس نے روئٹرز کو بتایا کہ ’سنہ 200 تک اس کی پیداوار ملکی ضرورت کے لیے صرف 30 کلو سالانہ تھی۔‘

سنہ 2008 میں معاشی بحران کے بعد تبدیلی آئی۔ اب یونان سالانہ چار ٹن زعفران پیدا کرتا ہے جس کا 70 فیصد بیرون ملک برآمد کیا جاتا ہے۔

یونانی زعفران تصویر کے کاپی رائٹ Reuters

زعفران یونان کے صرف اسی خطے میں پیدا ہوتا ہے اور اسے کروکوس کوزنس کا نام دیا جاتا ہے، اور یونان میں ایک گرام زعفران کی قیمت تقریبا چار یورو ہوتی ہے۔

یونانی زعفران تصویر کے کاپی رائٹ Reuters

ایک کلو زعفران تقریباً ڈیڑھ لاکھ پھولوں سے حاصل ہوتا ہے جو تقریبا 1500 یورو میں فروخت ہوتا ہے۔ پھولوں کو ہاتھ سے توڑا جاتا ہے اور خواتین ان کا وزن اور پیکنگ کرتی ہیں۔ کام کے دوران خواتین کے میک اپ اور پرفیوم کے استعمال پر پابندی ہوتی ہے تاکہ ان کی ذائقے کو برقرار رکھا جائے۔

یونانی زعفران تصویر کے کاپی رائٹ Reuters

ایران دنیا میں زعفران کی سب سے زیادہ پیداوار کرنے والا ملک ہے تاہم یونانی ماہرین کا کہنا ہے کہ یونانی زعفران کی بھی مانگ میں اضافہ ہو رہا ہے۔ اس حوالے سے سنہ 2019 سے چین کو برآمد کرنے کے لیے دونوں ممالک کے درمیان بات چیت بھی کی جا رہی ہے۔

یونانی زعفران تصویر کے کاپی رائٹ Reuters

تمام تصاویر روئٹرز کی ہیں

متعلقہ عنوانات

اسی بارے میں