پاکستان کو سنگین نتائج کی دھمکی

امریکہ کی وزیر خارجہ ہیلری کلنٹن نے امریکہ میں کسی بھی دہشت گرد حملے کی صورت میں جس کا تعلق پاکستان سے ہو پاکستان کو سنگین نتائج کے بارے میں خبردار کیا ہے۔

تاہم امریکی وزیر خارجہ ہیلری کلنٹن نے ان سنگین نتائج کی وضاحت نہیں کی جن کے بارے میں پاکستان کو خبر دار کیا گیا ہے۔

پاکستان کو خبر دار کرنے کے ساتھ ہی وزیر خارجہ نے اس بات کا بھی اعتراف کیا ہے کہ پاکستان دہشت گردی سے نمٹنے کے لیے زیادہ تعاون کر رہا ہے۔ انھوں نے کہا کہ اس تعاون کو مزید بہتر بنانے کی گنجائش موجود ہے۔

گزشتہ ہفتے کو نیویارک میں پاکستان نژاد فیصل شہزاد کو نیویارک کے ٹائمز سکوائر میں بم رکھنے کے الزام میں گرفتار کیا گیا تھا۔

درین اثناء امریکی وزیر دفاع رابرٹ گیٹس نے کہا ہے کہ امریکہ پاکستان کو دہشت گردی کو جڑ سے اکھاڑنے کے لیے مزید مدد فراہم کرنے کے لیے تیار ہے جس میں پاکستانی سکیورٹی اہلکاروں کی تربیت کی تجویز بھی شامل ہے۔

اسی بارے میں