’امید ہے کہ تعلقات خراب نہیں ہونگے‘

فائل فوٹو
Image caption نو مبینہ جاسوسوں پر منی لانڈرنگ کا کیس بھی چلایا جائے گا

روسی وزیراعظم ولادیمیر پوتن نے امید ظاہر کی ہے کہ امریکہ میں مبینہ جاسوسوں کے گروہ کی گرفتاری کے واقعے کے بعد دونوں ممالک کے درمیان تعلقات متاثر نہیں ہونگے۔

اس سے پہلے روس کی وزارتِ خارجہ نے کہا تھا کہ امریکی الزامات بے بنیاد اور یہ سرد جنگ کے دور میں لے گئے ہیں۔

امریکہ نے منگل کو دس افراد کو مبینہ طور پر روس کے لیے جاسوسی کرنے کے الزام میں گرفتار کیا تھا۔ان میں بعض افراد روسی شہری بیان کیے جاتے ہیں۔

روسی وزیراعظم ولادیمیر پوتن نے بھی ان گرفتاریوں کی مذمت کی تھی تاہم انہوں نے روس کے دورے پر آئے سابقِ امریکی صدر بل کلنٹن سے ملاقات میں کہا کہ وہ اس واقعے کو دونوں ملکوں کے بہتر ہوتے تعلقات میں رکاوٹ نہیں سمجھتے۔

انھوں نے کہا کہ ’ آپ نے پولیس کو خود کارروائی کرنے کی اجازت دے رکھی ہے، اور وہ لوگوں کو جیلوں میں بھیج رہے ہیں۔‘ انھوں نے مزید کہا کہ ’ ہمیں امید ہے کہ دونوں ممالک کے تعلقات جو حالیہ سالوں میں بہتر ہونا شروع ہوئے ہیں وہ قائم رہیں گے، اور جو لوگ بہتر تعلقات کی قدر جانتے ہیں وہ اس کو سمجھیں گے۔‘

Image caption سابق امریکی صدر بل کلنٹن سرمایہ کاری کانفرس میں شرکت کے لیے روس میں ہیں

دوسری جانب امریکی محکمہ خارجہ کے ترجمان رابرٹ گبز نے کہا ہے کہ روس کے ساتھ تعلقات کی بہتری کا عمل جاری رہے گا۔ ترجمان کے مطابق صدر اوباما گرفتاریوں کے متعلق جانتے تھے اور انہیں متعدد بار آگاہ کیا گیا تھا۔‘

پیر کو گرفتار کیے گئے دس مبینہ جاسوسوں میں سے پانچ کو نیویارک میں مین ہیٹن کی فیڈرل کورٹ میں پیش کیا گیا تھا۔

عدالت میں پیش کی جانے والی دستاویز کے مطابق مبینہ طور پر ان جاسوسوں کو جوہری ہتھیاروں، اسلحے کے کنڑول کی پوزیشن، ایران، وائٹ ہاوس میں افواہیں، سی آئی اے اور سیاسی جماعتوں کے بارے میں معلومات فراہم کرنے کا کہا جاتا تھا۔

گرفتار ہونے والے مبینہ جاسوسوں میں بعض سنہ انیس سو نوے سے امریکہ میں قیام پذیر ہیں۔ حکام کے مطابق ان افراد کو پالیسی سازی کے عمل میں داخل ہونے کے لیے روس کی خفیہ ایجنسی نے تربیت فراہم کی تھی۔ حکام کا کہنا ہے کہ مبینہ جاسوسوں کو کہا گیا تھا کہ امریکی حکام کے دوست بن کر رہیں اور مختلف ذرائع سے روسی حکومت کے لوگوں کو معلومات فراہم کریں۔

گیارواں جاسوس روپوش ہو گیا تھا جسے بعد میں قبرص سے گرفتار کیا گیا تھا۔

اسی بارے میں