شامی مارٹر بم حملہ، ترکی کی جوابی کارروائی

آخری وقت اشاعت:  پير 8 اکتوبر 2012 ,‭ 00:08 GMT 05:08 PST
ترکی میں مارٹر حملہ

گزشتہ پانچ روز سے ترک اور شام کی سرحد پر دونوں جانب سے مارٹر بموں اور گولیوں کا تبادلہ ہو رہا ہے

ترکی کے ایک گاؤں پر شام کی طرف سے پھینکے جانے والے ایک مارٹر بم کے حملے کے بعد ترک توپ خانے نے جوابی کارروائی کی ہے۔ یہ مسلسل پانچواں روز ہے جب ترکی نے کسی کارروائی کا جواب دیا ہو۔

گزشتہ ہفتے شام کی طرف سے ترک گاؤں اکجا قلعہ میں گرنے والے مارٹر گولوں میں پانچ ترک شہری ہلاک ہو گئے تھے۔ اس واقعے کے بعد ترک پارلیمان کی جانب سے فوج کو شام میں داخل ہو کر کارروائی کرنے کی اجازت دی گئی تھی۔

شام کے سرکاری میڈیا کے مطابق دارالحکومت دمشق میں پولیس کے صدر دفتر کے باہر ایک کار بم حملے میں کم از کم ایک پولیس اہلکار ہلاک ہو گیا ہے۔ دھماکے سے پولیس کے صدر دفتر کو نقصان پہنچا ہے۔

عینی شاہدین کے مطابق دھماکے کے بعد گولیوں کی شدید آوازیں سنائی دی گئیں۔

دمشق میں پولیس صدر دفتر پر حملہ

دمشق میں پولیس ہیڈکوارٹر پر حملے میں عمارت کو کافی نقصان پہنچا ہے

اس سے قبل دن کے وقت شام کے دوسرے بڑے شہر حلب میں شدید لڑائی جاری رہی۔ یہ لڑائی باغیوں کے کنٹرول والے دو علاقوں میں ہوئی۔

خبر رساں ادارے اے ایف پی کے مطابق جنگی جہازوں نے باب الحديد اور شار ڈسٹرکٹ پر بمباری کی۔

اطلاعات کے مطابق شامی فورسز کی کارروائی دمشق اور حمص میں بھی جاری ہے۔

دریں اثناء غیر مصدقہ اطلاعات کے مطابق باغیوں نے ہاتے صوبے میں ترک سرحد کے قریب ایک فوجی چوکی پر قبضہ کر لیا ہے۔ اس علاقے میں جھڑپوں کے بعد ہی شامی فوج کی طرف سے چلائے گئے مارٹر بم سرحد پار ترکی میں گرے تھے۔

اقوامِ متحدہ کے اندازوں کے مطابق شام میں جاری جنگ سے اب تک بیس ہزار افراد ہلاک ہوئے ہیں، جبکہ حزبِ مخالف کے کارکنان یہ تعداد تیس ہزار بتاتے ہیں۔

اسی بارے میں

متعلقہ عنوانات

BBC © 2014 بی بی سی دیگر سائٹوں پر شائع شدہ مواد کی ذمہ دار نہیں ہے

اس صفحہ کو بہتیرن طور پر دیکھنے کے لیے ایک نئے، اپ ٹو ڈیٹ براؤزر کا استعمال کیجیے جس میں سی ایس ایس یعنی سٹائل شیٹس کی سہولت موجود ہو۔ ویسے تو آپ اس صحفہ کو اپنے پرانے براؤزر میں بھی دیکھ سکتے ہیں مگر آپ گرافِکس کا پورا لطف نہیں اٹھا پائیں گے۔ اگر ممکن ہو تو، برائے مہربانی اپنے براؤزر کو اپ گریڈ کرنے یا سی ایس ایس استعمال کرنے کے بارے میں غور کریں۔