سنوڈن کے ’استعمال‘ کے بعد ای میل سروس بند

Image caption سنوڈن غداری کے مقدمے میں امریکہ کو مطلوب ہیں

امریکہ کے خفیہ راز افشاء کرنے والے سی آئی اے کے سابق اہلکار ایڈورڈ سنوڈن کی جانب سے استعمال کی اطلاعات کے بعد دو امریکی ای میل سروسز کو بند کر دیا گیا ہے۔

امریکی ریاست ٹیکساس میں قائم لوابِٹ نامی ای میل سروس کو بند کیا گیا ہے۔

بی بی سی کے نامہ نگاروں کا کہنا ہے کہ لوابِٹ نامی ای میل سروس امریکی حکام کو اس کے صارفین کی معلومات تک رسائی سے روکنے کے لیے ایک قانونی جنگ لڑ رہی ہے۔

دوسری جانب ’سائیلنٹ سرکل‘ نامی ای میل سروس کو بھی بند کیا گیا ہے۔

سنوڈن کی جانب سے ماسکو ایئر پورٹ پر لوابِٹ کی ای میل سروس استعمال کرنے کی اطلاعات سامنے آنے کے بعد سے اس کی نگرانی کی جا رہی تھی۔

لوابِٹ کے مالک لیونسن نے اپنی ویب سائٹ پر جاری کیے گئے ایک پیغام میں کہا کہ وہ دس سال کی مسلسل محنت کے بعد لوابِٹ کو بند کرنے کا ایک مشکل فیصلہ کرنے جا رہے ہیں۔

انہوں نے کہا کہ ’میں نے لوابِٹ کے آپریشنز کو معطل کرنے کا فیصلہ کیا ہے‘۔

’سائیلنٹ سرکل‘ نامی ای میل سروس کا کہنا ہے کہ انہوں نے تکنیکی اور سیاسی وجوہات کی وجہ سے اپنی سروس کو بند کیا ہے۔

سابق امریکی جاسوس ایڈورڈ سنوڈن نے حال ہی میں امریکہ میں بڑے پیمانے پر انٹرنیٹ اور فون کالوں کی نگرانی کے پروگرام پرزم کے بارے میں راز افشاء کیے تھے جس کے بعد سے وہ غداری کے مقدمے میں امریکہ کو مطلوب ہیں۔

امریکی حکومت نے سنوڈن پر بغاوت کے مقدمے میں فرد جرم عائد کی ہے تاہم وہ امریکہ چھوڑ کر پہلے ہانگ کانگ گئے اور اس کے بعد انہوں نے روس میں عارضی پناہ حاصل کر لی ہے۔

دوسری جانب امریکی محکمۂ انصاف نے لوابِٹ کو بند کیے جانے پر کوئی تبصرہ نہیں کیا ہے۔

اسی بارے میں