برطانیہ میں طوفان اور بارش، ’لوگ سفر کرنے سے گریز کریں‘

Image caption حکام کا کہنا ہے کہ 130 کلومیٹر کی رفتار سے چلنے والی ہواؤں کے باعث سیلاب کا خطرہ ہے

برطانوی حکام نے انگلینڈ اور ویلز میں لوگوں کو متنبہ کیا ہے کہ سوموار کو طوفان کے باعث سفر کرنے سے گریز کریں جبکہ اس دوران ٹرین اور جہازوں کی آمد و رفت متاثر ہو گی۔

دوسری جانب لندن آنے والی پروازوں میں بھی کمی کردی گئی ہے۔

حکام کا کہنا ہے کہ ایک سو تیس کلومیٹر کی رفتار سے چلنے والی ہواؤں کے باعث سیلاب کا خطرہ ہے۔

صورتحال کے پیش نظر برطانوی وزیرِاعظم نے عوام کی حفاظت کے لیے اٹھائے جانے والے اقدامات کے بارے میں ہونے والے اجلاس کی صدارت بھی کی۔

دوسری جانب ایسٹ سسیکس میں سمندر میں بہہ جانے والے ایک چودہ سالہ بچے کی تلاش روک دی گئی ہے۔

نیٹ ورک ریل کے اعلیٰ عہدیدار روبن گسبی کا کہنا ہے کہ لوگوں کو ریل کے شیڈول متاثر ہونے کے باعث کافی زحمت اٹھانی پڑے گی۔

گسبی کے مطابق برمنگھم، نوٹنگ ہل اور مڈ لینڈز میں ٹرین کے شیڈول متاثر ہوں گے۔

برطانوی محکمہ موسمیات کے مطابق یہ طوفان ایسا ہے جو ہر سال نہیں آتا۔ محکمہ موسمیات کے مطابق چھ سے نو گھنٹوں کے درمیان 20 سے 40 ملی میٹر بارش متوقع ہے۔

ہیتھرو ہوائی اڈے سے کہا گیا ہے کہ وہ ہوائی جہازوں کی آمدو رفت میں پانچ سے 20 فیصد کمی کریں۔ اس کمی کے باعث اندازاً 60 پروازیں منسوخ ہوں گی۔

میٹروپولیٹن پولیس نے عوام سے درخواست کی ہے کہ امرجنسی کے لیے 999 کے نمبر کی بجائے 101 نمبر ملائیں۔ تاہم اگر بہت زیادہ ایمرجنسی ہے تو پھر 999 ڈائل کریں۔