پیرس: سعودی شہزادہ لُٹ گیا

تصویر کے کاپی رائٹ Getty
Image caption اطلاعات کے مطابق قافلہ سعودی سفارت خانے سے ایک مقامی ہوائی اڈے کی طرف جا رہا تھا

فرانس کے دارالحکومت پیرس میں پولیس کا کہنا ہے کہ ایک سعودی شہزادے کے قافلے پر ڈاکوؤں نے حملہ کر کے تقریباً ڈھائی لاکھ یورو کی نقدی چوری کر لی ہے۔

رپورٹ کے مطابق قافلہ اتوار کی شام شمالی پیرس سے گزرتا ہوا لا بورژے کے ہوائی اڈے کی جانب جا رہا تھا جب اس پر حملہ کیا گیا۔

حملہ آور ایک گاڑی لے اڑے جس میں نقدی اور چند اہم دستاویزات موجود تھے اور ایک ڈرائیور کے ساتھ ساتھ دو دیگر افراد بھی سوار تھے۔ تینوں افراد کو بعد میں ڈاکوؤں نے گاڑی سے صحیح سلامت اتار دیا۔

بتایا جا رہا ہے کہ قافلہ سعودی سفارتخانے سے آ رہا تھا اور اس واقعے میں کوئی زخمی نہیں ہوا۔

اطلاعات کے مطابق حملہ آوروں کے پاس کلاشنکوف رائفلیں تھیں۔

اس واقعے میں کسی کی جانب سے گولی چلانے کی کوئی اطلاع نہیں ہے تاہم چوری شدہ گاڑی بعد میں جلی ہوئی ملی۔

پولیس کے ترجمان نے بتایا کہ یہ گاڑی ایک مرسیڈیز منی وین تھی اور اس میں ڈھائی لاکھ یورو کے علاوہ سعودی سفارتخانے کی چند خفیہ دستاویزات بھی تھیں۔

اسی بارے میں