امریکی فوج کو ہوائی اڈے دینے کی تردید

تصویر کے کاپی رائٹ AFP
Image caption اینجرلیک کے قریب ہوائی اڈہ امریکی فوج امداد اور رسد کے لیے استعمال کرتی ہے

ترکی کے حکام نے ان خبروں کی تردید کی ہے انھوں نے شام میں دولت اسلامیہ کے ٹھکانوں پر بمباری کرنے کے لیے امریکی فوج کو ترکی کے فضائی اڈے استعمال کرنے کی اجازت دینے کے بارے میں امریکہ کے ساتھ کوئی معاہدہ کیا ہے۔

غزہ میں بی بی سی کے نامہ نگار مارک لیواون کے مطابق ترکی کے وزیر اعظم کے دفتر کے ذرائع کا کہنا ہے کہ ترکی اینجرلیک کے قریب واقع ہوائی اڈہ یا کوئی دوسرا فوجی اڈہ امریکہ کو دولت اسلامیہ پر بمباری کے لیے استعمال کرنے کی اجازت نہیں دے گا ۔

ایک دن قبل امریکی صدر کی قومی سلامتی کی مشیر سوسن رائس نے ایک امریکی ٹیلی ویژن نیٹ ورک کے ساتھ انٹرویو میں کہا تھا کہ ترکی نے ادرنہ کے ہوائی اڈے کو جو کہ اینجرلیک کے قصبے کے قریب واقع ہے اسے شام اور عراق میں بمباری کرنے کے لیے امریکی فوج کو دینے پر رضا مندی ظاہر کردی ہے۔

فرانسیسی خبر رساں ادارے اے ایف پی کے مطابق ترکی کی حکومت نے امریکی حکام کی طرف سے جاری ہونے والے ان بیانات کی سختی سے تردید کی ہے کہ وہ امریکی فوج کو جنوبی ترکی میں واقع اینجرلیک کا اہم فضائی اڈہ دولت اسلامیہ کے ٹھکانوں پر بمباری کرنے کے لیے دینے پر تیار ہے۔

اے ایف پی کا کہنا ہے کہ ترکی کے حکام نے اس بات کی تصدیق کی ہے کہ وہ شامی باغیوں کو تربیت دینے کے لیے تیار ہے۔

انقرہ ان دنوں مغربی ممالک کی طرف سے شدید دباؤ میں ہے کہ وہ دولت اسلامیہ کے جنگجوؤں کے خلاف امریکہ اور دیگر مغربی ملکوں کی طرف سے کی جانے والی مشترکہ کارروائیوں میں زیادہ سے زیادہ مدد کرے۔

تصویر کے کاپی رائٹ Getty
Image caption کوبانی کا قصبہ ترکی کی سرحد سے چند کلو میٹر کے فاصلے پر ہے

کوبانی کا قصبہ جہاں کرد جنگجو دولت اسلامیہ کے خلاف برسرپیکار ہیں وہ ترکی کی سرحد سے چند کلو میٹر کے فاصلے پر واقع ہے۔

انقرہ میں کابینہ کے ایک اہم اجلاس کے بعد ترکی کے نائب وزیر اعظم اخبار نے نویسوں کو بتایا کہ وہ اپنے اتحادیوں کے ساتھ اس معاملے پر مذاکرات کر رہے ہیں لیکن فضائی اڈے کے حوالے سے کوئی پیش رفت نہیں ہوئی ہے۔

امریکی فوج یہ فضائی اڈہ امدادی اور رسد کے لیے استعمال کرتی ہے لیکن فضائی حملے کرنے کے لیے اسے ترکی کی حکومت سے علیحدہ سے اجازت لینے کی ضرورت ہے۔

اے ایف پی نے نام نہ ظاہر کرتے ہوئے ایک ترک وزیر کے حوالے سے کہا ہے کہ اینجرلیک کے قریب فضائی اڈے کے بارے میں امریکی فوج سے کوئی نیا معاہدہ نہیں ہوا ہے۔

انھوں نے کہا کہ مذاکرات جاری ہیں اور ترکی نے اپنی شرائط میں کوئی تبدیلی نہیں کی ہے۔

اتوار کو امریکہ کے اعلی دفاعی اہلکار نے کہا تھا کہ ترکی نے امریکی فوج کو اپنے ہوائی اڈے استعمال کرنے کی اجازت دے دی ہے۔

اسی بارے میں