سعودی بلاگر کو کوڑے لگانے کی سزا دوبارہ ملتوی

تصویر کے کاپی رائٹ AFP
Image caption رائف بداوی کو گذشتہ سال مئی میں توہین مذہب کے الزام میں سزا سنائی گئی تھی

حقوق انسانی کی عالمی تنظیم ایمنسٹی انٹرنیشنل کے مطابق سعودی عرب نے بلاگر رائف بداوی کو دی جانے کوڑوں کی سزا ایک بار پھر ملتوی کر دی ہے۔

ایک ہفتہ پہلے ہی سعودی عرب نے سعوی بلاگر بداوی کو دی جانے والی کوڑوں کی سزا طبی بنیادوں پر ملتوی کر دی تھی۔

سعودی بلاگر کی سزا پر نظرِثانی کی جائے گی

ایمنسٹی انٹرنیشنل کے مطابق ڈاکٹروں کی تجویز پر بداوی کو دی جانے والی سزا کو طبی بنیادوں پر ملتوی کیا گیا ہے۔

رائف بداوی کی اہلیہ انصاف حیدر نے بھی تصدیق کی ہے کہ ان کے شوہر کو جمعے کو کوڑوں کی سزا نہیں دی جائے گی تاہم انھیں اپنے شوہر کی صحت کے بارے میں تشویش ہے۔

انصاف حیدر 2012 میں اپنے شوہر پر قاتلانہ حملے کے بعداپنے تین بچوں کے ساتھ کینیڈا منتقل ہو گئی تھیں۔

رائف بداوی کو گذشتہ سال مئی میں توہین مذہب کے الزام میں 10 سال قید اور ایک ہزار کوڑے مارنے کی سزا سنائی گئی تھی۔

تصویر کے کاپی رائٹ Badawi Familly
Image caption بلاگر رائف بداوی اپنے تین بچوں کے ساتھ

کوڑوں کی سزا پر 20 ہفتوں میں پوری جانے تھی اور پہلی بار انھیں رواں ماہ کی نو تاریخ کو 50 کوڑے مارے گئے تھے تاہم گذشتہ جمعے کو کوڑوں کی سزا ملتوی کر دی گئی تھی۔

اس کے بعد بی بی سی کو حاصل ہونے والی معلومات کے مطابق سعودی شاہ کے دفتر نے سعودی بلاگر رائف بداوی کو ملنے والی ایک ہزار کوڑوں کی سزا نظرِ ثانی کے لیے سپریم کورٹ کو بھیج دی تھی۔

نو جنوری کو جدہ کی ایک مسجد کے باہر بداوی کو سرِ عام کوڑے مارے گئے تھے اور اس سزا پر امریکہ، کینیڈا، جرمنی اور ناروے سمیت کئی ملکوں نےتنقید کی تھی۔

بداوی نے سعودی عرب میں لبرل سعودی نیٹ ورک کے نام سے ایک آن لائن فورم تشکیل دیا تھا جس کا مقصد سعودی عرب میں مذہبی اور سیاسی معاملات پر بات چیت کی حوصلہ افزائی کرنا تھا۔

اسی بارے میں