رونالڈو کی والدہ کے ہینڈ بیگ سے 55 ہزار یورو برآمد

تصویر کے کاپی رائٹ Getty
Image caption رونالڈو کی والدہ حکام کو اطمینان بخش جواب نہ دے سکیں کہ وہ اتنی زیادہ رقم کیوں لے کر سفر کر رہی تھیں

سپین کے اخبار یل منڈو کا کہنا ہے کہ فٹ بال کی دنیا کے امیر ترین کھلاڑی کرسچیانو رونالڈو کی والدہ کو پچھلے ماہ میڈرڈ کے ہوائی اڈے پر اس وقت روک لیا گیا جب ان کے ہینڈ بیگ سے 55 ہزار یورو برآمد ہوئے۔

رپورٹ کے مطابق ڈولوریز ایوی ایرو کو ہوائی اڈے پر اس وقت روکا گیا جب وہ پرتگال کے لیے جہاز کا انتظار کر رہی تھیں۔

اخبار کے مطابق رونالڈو کی والدہ حکام کو اطمینان بخش جواب نہ دے سکیں کہ وہ اتنی زیادہ رقم کیوں لے کر سفر کر رہی تھیں۔

حکام کا کہنا ہے کہ رونالڈو کی والدہ کے پاس سے جو رقم برآمد ہوئی ہے وہ اس وقت تک ضبط کر لی جائے گی جب تک کہ وہ جرمانہ نہیں ادا کرتیں اور رقم لے جانے کے لیے درست دستاویزات جمع نہیں کراتیں۔

سپین میں منی لانڈرنگ کو روکنے کے لیے قانون ہے کہ بغیر اجازت کے سپین سے باہر 10 ہزار یوو لے جائے جا سکتے ہیں۔

اخبار کے مطابق یہ قانون جو بھی توڑتا ہے وہ شخص صرف انتظامی جرم کا مرتکب ہوتا ہے۔

رپورٹوں کے مطابق ڈولوریز میڈرڈ کے قریب اپنے بیٹے رونالڈو کے عالیشان بنگلے میں لمبا عرصہ رہتی ہیں۔

رونالڈو کی والدہ کو 665 ڈالر جرمانہ ادا کرنا ہو گا۔

یاد رہے کہ رونالڈو کو ریئل میلارڈ کے ساتھ معاہدے سے تین لاکھ پچاسی ہزار ڈالر فی ہفتہ ملتے ہیں۔

اسی بارے میں