برطانیہ: ہوائی حادثے میں اسامہ بن لادن کے خاندان کے تین افراد ہلاک

تصویر کے کاپی رائٹ Natan film
Image caption اس حادثے کے نتیجے میں طیارے میں سوار افراد کے علاوہ کسی اور شخص کو نقصان نہیں پہنچا تھا

برطانیہ کے علاقے ہیمپشائر میں حادثے کا شکار ہونے والے نجی طیارے کے بارے میں سعودی عرب کے سفارتخانے کا کہنا ہے کہ اس میں اسامہ بن لادن کے خاندان کے افراد سوار تھے۔

جمعے کو بلیک بش ہوائی اڈے پر پیش آنے والے اس حادثے میں پائلٹ اور طیارے میں سوار تینوں مسافر ہلاک ہوگئے تھے۔

سعودی سفارت خانے کی جانب سے جاری کیے گئے ایک بیان میں کہا گیا ہے کہ برطانیہ میں سعودی سفیر شہزادہ محمد بن نواف ال سعود نے ہلاک ہونے والے افراد کے خاندان سے تعزیت کی ہے۔

’شہزادہ محمد بن نواف سعود نے اس حادثے کے نتیجے بن لادن خاندان کو جو بہت بڑا نقصان ہوا ہے اس پر خاندان اور ان کے عزیز واقارب سے تعزیت کی ہے۔‘

سفارت خانے کا کہنا ہے کہ سعودی حکام اس حادثے کی تحقیقات کرنے والے برطانوی اہلکاروں سے رابطے میں ہیں۔

سفارت خانے کا مزید کہنا ہے کہ وہ برطانوی حکام کے ساتھ مل کر کام کر رہے ہیں اور ان کی کوشش ہے کہ مرنے والوں کی میتوں کو جلد از جلد تدفین کے لیے سعودی عرب پہنچایا جائے۔

سعودی سفارت خانے نے ہلاک ہونے والے مسافروں کے نام ظاہر نہیں کیے ہیں۔

اطلات کے مطابق اٹلی سے برطانیہ آنے والا یہ طیارہ القاعدہ کے سابق سربراہ اسامہ بن لادن کے خاندان کی ملکیت تھا۔

خیال رہے کہ جعمے کو بلیک بش ہوائی اڈے پر لینڈنگ کے وقت یہ طیارہ پائلٹ سے بےقابو ہو کر رن وے کے جنگلے کو توڑتا ہوائی اڈے کے قریب واقع کاروں کے ایک شو روم میں کھڑی گاڑیوں سے ٹکرا کر تباہ ہو گیا تھا۔