ٹرمپ مسلمانوں پر پابندی کے موقف پر قائم

تصویر کے کاپی رائٹ Getty

صومالیہ کے شدت پسند گروہ الشباب کی پروپیگنڈا ویڈیو میں اپنی تقریر کا اقتباس استعمال کیے جانے کے بعد ریپبکن پارٹی کا صدارتی امیدوار بننے کی دوڑ میں شامل ڈونلڈ ٹرمپ نے ایک مرتبہ پھر مسلمانوں کے امریکہ میں داخلے پر پابندی کے موقف کا دفاع کیا ہے۔

ڈونلڈ ٹرمپ کا کہنا تھا کہ لوگوں نے ان کی تعریف کی تھی کہ انھوں نے اس ’مسئلے‘ پر دیانتداری سے بات کی ہے جس پر بات کرنے سے دوسرے رہنما کتراتے ہیں۔

الشباب کی پراپیگنڈا ویڈیو میں ڈونلڈ ٹرمپ

ڈونلڈ ٹرمپ کے مسلم مخالف بیان پر شدید ردِ عمل

الشباب کی پراپیگنڈا ویڈیو میں ڈونلڈ ٹرمپ

ڈونلڈ ٹرمپ کے مسلم مخالف بیان پر شدید ردِ عمل

امریکی چینل سی بی ایس سے بات کرتے ہوئے ریپبلکن پارٹی کے امیدوار کا کہنا تھا کہ اب لوگ اس مسئلے پر ’بات کرنا شروع ہو گئے ہیں۔‘

ریاست کیلیفورنیا میں فائرنگ کے واقعے کے بعد ڈونلڈ ٹرمپ نے کہا تھا کہ مسلمانوں کے امریکہ میں داخلے پر ’مکمل‘ پابندی عائد کر دینی چاہیے۔

ٹرمپ کا کہنا تھا کہ سرحدوں کو اس وقت تک مکمل طور پر بند کر دینا چاہیے جب تک ’ہمارے ملک کے نمائندگان اس بات کا تعین نہیں کر لیتے کہ کیا ہو رہا ہے۔‘

ان کے اس بیان کی امریکہ میں شدید مذمت کی گئی تھی اور خود ان کی جماعت کے دوسرے صدارتی امیدواروں، صدر اوباما اور برطانوی وزیرِ اعظم ڈیوڈ کیمرن نے بھی انہیں شدید تنقید کا نشانہ بنایا تھا۔

تصویر کے کاپی رائٹ AFP
Image caption ڈونلڈ ٹرمپ نے اس سے قبل اپنی انتخابی مہم کے سلسلے میں ہر ہفتے دو کروڑ روپے خرچ کرنے کا اعلان کیا تھا

بعد میں امریکہ کی سابق سیکریٹری خارجہ اور صدارتی امیدوار کی دوڑ میں شامل ہیلری کلنٹن کا کہنا تھا کہ ڈونلڈ ٹرمپ شدت پسند تنظیم دولت اسلامیہ کے لیے ’ سب سے بڑے بھرتیاں کروانے والے‘ بنتے جا رہے ہیں۔

سی بی سی کے پروگرام میں ڈونلڈ ٹرمپ سے سوال کیا گیا کہ وہ اس بارے میں کیا کہتے ہیں کہ ان کے الفاظ کو الشباب مزید مسلمانوں کو جہاد کی جانب راغب کرنے کے لیے استعمال کر رہی ہے؟

جواب میں ان کا کہنا تھا کہ ’دیکھیں۔ ایک مسئلہ موجود ہے، میں نے صرف اس پر بات کی ہے۔ کئی لوگوں نے مجھے سراہا ہے اور کہا کے آپ نے بڑی ہمت کا مظاہرہ کیا ہے اور اس مسئلے پر بات کی ہے، ورنہ یہ بات سچ ہے لیکن کوئی دوسرا اس معاملے پر بات نہیں کرنا چاہتا۔‘

’وہ لوگ جن کے خیالات مجھ سے مختلف ہیں، وہ بھی اب یہی کہہ رہے ہیں کہ ہو سکتا ہے کہ ٹرمپ درست بات ہی کر رہے ہوں۔ وہ لوگ کہتے ہیں کہ اب وہ میری بات پر غور کرنا چاہتے ہیں۔‘

اس ویڈیو میں افریقی نسل کے امریکیوں سے مطالبہ کیا گیا ہے وہ اسلام قبول کرلیں اور ’مقدس جنگ‘ کا حصہ بنیں۔ ویڈیو میں کہا گیا ہے کہ امریکہ میں نسل پرستی، پولیس کے مظالم اور مسلمان مخالف جذبات غالب ہیں۔

واضح رہے کہ الشباب صومالیہ میں مغرب نواز حکومت کا تختہ الٹ کر شریعت کا نفاذ چاہتی ہے۔

اسی بارے میں