ٹرمپ نے موسولینی سے منسوب قول ری ٹویٹ کیا

تصویر کے کاپی رائٹ Twitter
Image caption یہ ٹویٹ پہلے موسولینی کے اطالوی خطاب کے نام سے بنے اکاؤنٹ سے کیا گیا

امریکہ میں ری پبلکن پارٹی کا صدارتی امیدوار بننے کی دوڑ میں شامل ڈونلڈ ٹرمپ نے اٹلی کے فسطائی رہنما بنیتو موسولینی سے منسوب ایک قول کو ری ٹویٹ کیا ہے۔

’بھیڑ کی طرح 100 سال جینے سے بہتر ہے کہ شیر کی طرح ایک دن جیا جائے۔‘ پر مبنی یہ ٹویٹ ایک مزاقاً بنائے گئے اکاؤنٹ سے کیا گیا جس میں ٹرمپ کا بھی ٹوئٹر ہینڈل شامل کیا گیا۔

پوپ نے ٹرمپ کی عیسائیت پر سوالیہ نشان لگا دیا

یہ اکاؤنٹ @ilduce2016 کے نام سے ہے جو موسولینی کا اطالوی خطاب ہے۔

جب ٹرمپ سے اس ٹویٹ کے بارے میں پوچھا گیا تو ان کا جواب تھا کہ وہ دلچسپ اقوال کے ساتھ منسوب ہونا پسند کرتے ہیں۔

این بی سی کے پروگرام میں ان کا کہنا تھا ’ موسولینی ، موسولینی تھے۔ اس سے کیا فرق پڑتا ہے۔ کیا اس نے آپ کی توجہ حاصل نہیں کی؟‘

تصویر کے کاپی رائٹ Reuters

موسولینی نے سنہ 1922 سے لے کر سنہ 1943 تک اٹلی میں حکومت کی اور سنہ 1943 میں انھوں نے امریکہ سے جنگ کی۔

نامہ نگاروں کا کہنا ہے کہ یہ ایک ایسے رویے تازہ مثال ہے جس سے کسی دوسرے امیدوار کو تو سخت نقصان پہنچتا لیکن ایسا لگتا ہے کہ ریپبلکن پارٹی کے صف اول کے امیدوار ڈونلڈ ٹرمپ کو اس سے کوئی فرق نہیں پڑے گا۔

ان کی مہم میں کئی چونکانے والے لمحات آئے جن میں سے ایک ان کے سابق حریف اور نیو جرسی کے گورنر کرس کرسٹی کی جانب سے ان کی توثیق کیا جانا ہے۔

خیال رہے کہ ڈونلڈ ٹرمپ نے سیاست کا تجربہ نہ ہوتے ہوئے بھی اب تک صدارتی امیدوار کے چناؤ کے لیے اب تک ریاستوں میں ہونے والے چار کاکسز یا پارٹی انتخابات میں سے تین میں کامیابی حاصل کی ہے۔

آئندہ منگل کو اسی سلسلے میں مزید 11 ریاستوں میں ووٹنگ ہونے والی ہے۔

اسی بارے میں