سینڈرز نے ویمنگ میں بھی کلنٹن کو شکست دے دی

تصویر کے کاپی رائٹ AP
Image caption مسٹر سینڈز نے مسز کلنٹن کے 21 ووٹوں فیصد ووٹوں کے مقابلے میں 79 فیصد کے قریب ووٹ حاصل کیے

امریکہ میں ڈیموکریٹک پارٹی کے لیے صدارتی امیدوار کی دوڑ میں شامل برنی سینڈرز نے ریاست ویمنگ میں پارٹی ممبران کے زیادہ ووٹ حاصل کر کے ہلیری کلنٹن کو شکست دے دی ہے۔

برنی سینڈرز نے حال ہی میں آٹھ ریاستوں میں ہونے والے ڈیموکریٹک پارٹی کے انتخابات میں سے سات میں فتح حاصل کی ہے۔ تاہم ان کی حریف ہلیری کلنٹن کو اب بھی ان پر واضح برتری حاصل ہے۔

دونوں امیدوار رواں ماہ ریاست نیویارک میں پارٹی کے صدارتی امیدوار کے چناؤ کے لیے ہونے والے انتخابات کی بھرپور تیاری کر رہے ہیں۔

اس سے قبل سینڈرز نے واشنگٹن، الاسکا اور ہوائي میں بھی کامیابیاں حاصل کیں تھیں۔ ان حالیہ کامیابیوں کے بعد برنی سینڈرز کے حمایتی مزید فتوحات کے لیے پر امید نظر آتے ہیں۔

خیال رہے کہ اب تک ہونے والے پرائمری انتخابات میں ہلیری کلنٹن کوسینڈرز کے 1061 مندوبین کے مقابلے میں 1749 مندوبین کی حمایت حاصل ہے۔

پارٹی کا صدارتی امیدوار بننے کے لیے 2383 مندوبین کی حمایت ضروری ہے۔

یاد رہے کہ امریکہ میں صدارتی انتخابات رواں برس 8 نومبر کو منعقد ہو رہے ہیں۔

اسی بارے میں