دولت اسلامیہ کےجنگجوؤں کا جوابی حملہ

تصویر کے کاپی رائٹ Reuters
Image caption عراق افواج نے دعویٰ کیا ہے کہ دولت اسلامیہ کی مزاحمت کےباوجود افواج پیش قدمی کر رہی ہیں

دولت اسلامیہ کےجنگجوؤں نےمنگل کی الصبح فلوجہ میں عراقی افواج پر تازہ حملہ کیا ہے جو شہر کو دولت اسلامیہ کے قبضے سے آزاد کرانے کی کوشش کر رہی ہیں۔

گذشتہ روز عراقی افواج نےدعویٰ کیا تھا کہ افواج نے فلوجہ کے علاقے نوایمایا میں پیش قدمی کی ہے۔

٭ فلوجہ کی آزادی کا راستہ کتنا دشوار گزار ہے؟

٭ فلوجہ میں عام شہریوں کو ’بڑا خطرہ‘ ہے: اقوامِ متحدہ

فلوجہ آپریشن کے کمانڈر نے خبر رساں ادارے اے ایف پی کو بتایا ہے کہ منگل کی الصبح ہونے والے دولت اسلامیہ کے حملے تو پسپا کر دیاگیا ہے لیکن اس میں دونوں جانب سے جانی نقصان ہوا ہے۔

امدادی کارکنوں نے فلوجہ میں پھنسے ہوئے پچاس ہزار عام شہریوں کی حفاظت کے بارے میں تحفظات کا اظہار کیا ہے۔

ایسی اطلاعات بھی موصول ہو رہی ہیں کہ فلوجہ میں پھنسے ہوئے لوگ فاقہ کشی سے مر رہے ہیں اور آئی ایس کے ہمراہ لڑنے سے انکار کرنے پر لوگوں کو ہلاک کیا جا رہا ہے۔

عراقی فوج نے اعلان کیا تھا کہ انھوں نے دوبارہ شہر کا قبضہ حاصل کرنے کے لیے پوری شدت سے حملہ کیا ہے۔ عراقی افواج نے ابتدا میں کہا تھا کہ دولت اسلامیہ کے جنگجوؤں کی مزاحمت کے باوجود افواج پیش قدمی کر رہی ہیں۔

عراقی فوج نے فلوجہ میں پھنسے ہوئےافراد سے کہا ہے کہ یا تو وہ شہر چھوڑ دیں اور اگر ایسا نہیں کر سکتے تو گھروں کے اندر رہیں۔

تصویر کے کاپی رائٹ
Image caption امدادی کارکنوں نےفلوجہ میں پھنسے ہوئے پچاس ہزار عام شہریوں کی حفاظت کے بارے میں تحفظات کا اظہار کیا ہے

خود کو دولت اسلامیہ کہلوانے والی شدت پسند تنظیم دولت اسلامیہ نے سنہ 2014 میں اس شہر پر قبضہ کر لیا تھا۔ شمالی عراق میں موصل اور فلوجہ دو بڑے شہر ہیں جو دولت اسلامیہ کے قبضے میں ہیں۔

فلوجہ کوآزاد کرانے کے لیے جاری آپریشن کے کمانڈر لیفٹینٹ جنرل عبدل وہاب السعدی نے خبر رساں ادارے اے ایف پی کو بتایا کہ دولت اسلامیہ کے سو کے قریب جنگجوؤں نے افواج پر حملہ کیا ہے اور ان میں سے 75 جنگجو جوابی کارروائی میں مارے گئے ہیں۔

فلوجہ کی لڑائی

عراقی افواج نے فلوجہ کو دولت اسلامیہ کے قبضے سے چھڑانے کے لیے ایک آپریشن شروع کیا ہے

2014

فلوجہ پر دولت اسلامیہ کے قبضے سے پہلے اس کی آبادی تین لاکھ سے زیادہ تھی

2004

امریکہ کی عرا ق پر یلغار کے بعد فلوجہ سنی بغاوت کی علامت بن کر ابھرا۔ فلوجہ بغداد سے اردن اور شام کو ملانےوالی شاہراہ کو کنٹرول کرتا ہے

  • 200 فلوجہ کو مساجد کا شہر بھی کہا جاتا ہے۔ فلوجہ میں 200 سے زیادہ مساجد ہیں

انھوں نے کہا :’بھاری اسلحے سے لیس حملہ آوروں نے زبردست حملہ کیا لیکن انھوں نے کار بموں اور خود کش حملہ آوروں کو استعمال نہیں کیا۔‘

سپیشل فورسز کے دو اہلکاروں نے خبر رساں ادارے ایسوسی ایٹڈ کو بتایا کہ جہادیوں نے بارود سے بھری ہوئی چھ کارروں کو حملے کے لیے بھیجا لیکن ان میں سے کوئی بھی اپنے ہدف تک نہ پہنچ سکیں۔

ایک اندازے کے مطابق اس شہر میں 50 ہزار کے قریب شہری پھنسے ہوئے ہیں جبکہ چند سو خاندان ہی بحفاظت نکلنے میں کامیاب ہو سکے ہیں۔

سرکاری بیان کے مطابق عراقی فوج اور انسداد دہشت گردی یونٹ کے دستے مختلف جانب سے شہر کی جانب بڑھ رہے ہیں۔

اسی بارے میں