شمالی کوریا کا آبدوز سے بیلسٹک میزائل تجربہ ناکام

تصویر کے کاپی رائٹ AP
Image caption جنوبی کوریا کے مطابق شمالی کوریا کا تجربہ نکام رہا

جنوبی کوریا کی فوج کا کہنا ہے کہ شمالی کوریا نے ایک آبدوز سے بیلسٹک میزائل کا تجربہ کیا ہے جو کہ اپنے ابتدائی مرحلے میں ناکام ہو گیا ہے۔

جنوبی کوریا کا کہنا ہے کہ شمالی کوریا نے یہ ٹیسٹ جزیرہ نما کوریا کے مشرقی سمندری حصے میں کیا ہے۔

اس سے پہلے اس نے تین ماہ قبل ایک آبدوز سے اسی قسم کا تجربہ کیا تھا جو کہ ناکام رہا۔

شمالی کوریا کے بارے میں خیال ظاہر کیا جاتا ہے کہ وہ جوہری ہتھیار تیار کرنے کی کوشش کر رہا ہے جبکہ اقوام متحدہ نے کسی بھی قسم کے بیلسٹک میزائل کے تجربے کے لیے اس پر پابندیاں عائد کر رکھی ہیں۔

اقوام متحدہ کی قراردادوں کے مطابق، شمالی کوریا کسی بھی طرح کی بیلسٹک میزائل ٹیکنالوجی کا استعمال نہیں کر سکتا ہے۔

شمالی کوریا کے خطرے سے نمٹنے کے لیے امریکہ اور جنوبی کوریا نے ایک میزائل ڈیفنس سسٹم لگانے پر رضامندی ظاہر کی ہے۔

تصویر کے کاپی رائٹ EPA
Image caption یہ تصویر شمالی کوریا نے پہلے جاری کی تھی جس کے وقت اور مقام کے بارے میں علم نہیں

جنوبی کوریا کی فوج کے ایک بیان میں کہا گیا ہے کہ شمالی کوریا نے سنپو کے ساحل سے دور سمندر سے مقامی وقت کے مطابق 11:30 پر میزائل کا تجربہ کیا۔

شمالی کوریا نے اس بارے میں ابھی تک کوئی بیان جاری نہیں کیا ہے تاہم جنوبی کوریائی فوج کے بیان میں کہا گيا ہے کہ ’ایس ایل بی امی آبدوز سے معمول کے مطابق چھوڑا گيا لیکن یہ اندازہ لگایا جاتا ہے کہ وہ اپنی ابتدائی پرواز میں ناکام رہا۔‘

اس میں مزید کہا گیا: ’ہماری فوج شمالی کوریا کی جانب سے اس قسم کے اشتعال انگیز عمل کی سختی کے ساتھ مذمت کرتی ہے۔‘

اس سے قبل رواں ہفتے امریکہ نے شمالی کوریا کے رہنما کم جونگ ان پر پانبدی عائد کی تھی جسے پیانگ یونگ نے ’کھلے جنگی اعلان‘ کے مترادف قرار دیا تھا۔

اسی بارے میں