جب دکان دار نے ڈاکو کو منہ ہی نہیں لگایا

اپ کی ڈیوائس پر پلے بیک سپورٹ دستیاب نہیں

جب ایک مسلح ڈاکو نیوزی لینڈ میں سید احمد کا ریستوران لوٹنے کے لیے گھس آیا تو شاید اس کے وہم و گمان میں بھی نہیں ہو گا کہ مالک اسے بالکل نظر انداز کرے گا۔

کرائسٹ چرچ کے علاقے میں’ایجپشن کباب ہاؤس‘ نامی ریستوران کے مالک سید احمد اس وقت بالکل پر سکون رہے جب مسلح شخص نے اس سے رقم طلب کی۔

ریستوران کے اندر سی سی ٹی وی کیمرے سے کھینچی گئی ویڈیو فوٹیج میں یہ دیکھا جا سکتا ہے کہ ڈاکو مالک سے پیسے مانگنے کی کوشش رہا ہے لیکن مالک اسے بڑے آرام سے نظر انداز کر کے ایک گاہک کا آرڈر اسے تھیلے میں ڈال کر دے رہا ہے۔

احمد نے کہا: ’وہ میری دکان میں بندوق لے کر آیا اور کہا کہ پیسے دو۔ میں ہیرو نہیں ہوں، بس میں پر سکون رہا اور اسے اس کی توقع نہیں تھی۔ میں ایک تاجر ہوں اور میری ترجیح اپنا آرڈر پورا کرنا تھی۔‘

تصویر کے کاپی رائٹ Said Ahmed
Image caption سید احمد اپنے علاقے میں سیلیبرٹی بن چکے ہیں

انھوں نے مزید کہا: ’جب گاہک گیا تو میں نے باورچی خانے میں جا کر پولیس کو فون کیا۔ میں نے انھیں بھی بتایا اور انھیں یقین ہی نہیں آیا۔‘

کینٹربری پولیس نے مئی میں اپنے فیس بک صفحے پر واقعے کی سی سی ٹی وی فوٹیج شائع کی جسے اب تک ایک لاکھ 70 ہزار بار دیکھا اور 750 مرتبہ شیئر کیا گیا ہے۔

سید احمد کا کہنا ہے کہ سی سی ٹی وی فوٹیج نے انھیں مقامی سیلیبرٹی بنا دیا ہے جبکہ پولیس کے مطابق ڈاکو کی تلاش ابھی جاری ہے۔

اسی بارے میں