شامی فوج کی حلب میں باغیوں کے خلاف کارروائی

تصویر کے کاپی رائٹ AFP
Image caption شامی فوج کو باغیوں کے خلاف کامیابیاں ملی ہیں

شام کے سرکاری ذرائع ابلاغ کے مطابق سکیورٹی فورسز نے حلب شہر میں ان علاقوں کا کنٹرول واپس لینے کے لیے کارروائی شروع کی ہے جن پر گذشتہ ماہ باغیوں نے قبضہ کر لیا تھا۔

شامی سکیورٹی فورسز کو حلب میں شروع کی جانے والی اس نئی کارروائی میں فضائی مدد بھی حاصل ہے۔

٭ حلب میں باغیوں پر شامی فوج کے شدید فضائی حملے

سرکاری ٹی وی کے مطابق شہر کے جنوب میں سکیورٹی فورسز نے دو فوجی تربیتی مراکز پر دوبارہ کنٹرول حاصل کر لیا ہے۔

برطانیہ سے شام کی صورتحال پر نظر رکھنی والی غیر سرکاری تنظیم سیرئین آبزرویٹری فار ہیومن رائٹس نے ایک فوجی تربیتی مرکز اور ایئر فورس کے ٹیکنیکل کالج کو باغیوں سے واپس لینے کی تصدیق کی ہے۔

سرکاری ٹی وی چینل ثنا نے کہا ہے کہ سرکاری افواج ان علاقوں میں پیش قدمی کر رہی ہیں جہاں سے شہر کا محاصرہ مکمل ہو جائے گا۔

دوسری جانب امریکی صدر براک اوباما نے کہا ہے کہ شام میں جنگ بندی کے لیے روس اور امریکہ ایک معاہدے پر پہنچنے کی کوشش کر رہے ہیں۔

امریکی صدر اوباما نے چین میں جی ٹوئنٹی اجلاس کے موقع پر کہا ہے کہ’ ہم جن دو پارٹیوں کی حمایت کرتے ہیں، اس کے حوالے سے روس سے بڑے اختلافات ہیں اور اس کے علاوہ شام میں امن واپس لانے کے طریقۃ کار پر اختلافات ہیں۔‘

خیال رہے کہ شام میں جاری خانہ جنگی میں امریکہ باغیوں کی حمایت کرتاچلا آیا ہے جبکہ صدر بشارالاسد کو روس کی حمایت حاصل ہے۔

اسی بارے میں