بریتانیا لیک بیرکیشی پاره بیریشگه عیبلنگن

افغانستان ده گي بريتانيا ايلچي خانه سي خوف سيزليگني تامين له ياتگن شركت نينگ باشليغي رشوه بيرگنی اوچون عيب دار تاپليب ايككي ييل قماق جزا سيگه محكوم قيلنگن.

سابق حربي ملازم لردن بولميش بيل شاو اداري فسادگه قرشي كوره شه ياتگن افغانستان محكمه سي تامانيدن محاكمه بولگن. او 25000 دلار مبلغ هم جريمه پولز توله گن.خبرلرگه كوره اونينگ قانوني وكيللري محكمه تامانيدن آلينگن قرارگه قرشي ليك كورسه تيب قيته مراجعت قيلماغچي.

شاو جناب لري افغان ملازم لري تامانيدن اوتگن ییلی اكتوبر آيده ضبط ايتلگن ايككي زرهلي موترنينگ قويب يوبارليشي اوچون پول توله گنيني اعتراف قيلگن.

بو برينچه واقعه دير كي بوندي حالت ، اداري فساد گه قرشي كوره شيش اوچون قورلگن محاكمه تامانيدن كوريب چيقلماقده. بيراق ايرملرگه كوره ،افغان حكومتي ،شاو جناب لرني محاكمه قيليش بيلن خارجي لرني افغانستان ده گي اداري فسادده كينگ بيرشكلده قول بارديگن ادعا لرني اثبات لش اوچون بير اورنيش دير.

بو ادعا لر ايسه افغان حكومتي تامانيدن رد ايتلگن.

گاردين روزنامه سي خبر قيليشچه ، شاو جناب لري ، موتر لرنينگ دولت ملازم لري تامانيدن ضبط ايتليشي باعث ، رسمي بيرشكلده قانوني جريمه پولي توله گنيني تصور قيلگن.

خبرده كيليشچه ، جناب شاو عيدي محمد اسملي شخص بيلن اوچره شيب ، موتر لرني قويب يوبارليشي اوچون 25000 دلار توله گن.

مدافعه وكيللر نينگ محكمه ده ايتگنلري ديك ،‌شاو جناب لري پولني وقتيده توله گني ،‌و اينقسه تولنگن پول مقابليده حجت ني قولگه كيرتيشي ، رشوه بير مگنليگی ني اثباتليدي روزنامه گه كوره شاو جناب لري عيني دمده دولت ملازم لري بيلن بو خصوصده همكارليك قيليب ، صحبت لر و تيكشرو لرگه اوز استگي بيلن قتنشگن.

مارچ آي نينگ 3 ينچي سيده حبس گه آلنيشي دن اول شاو جناب لري بريتانيا ده گي تعطيلاتي دن هم قيتگن ايكن .

خبرلرگه كوره شاو جناب لري يقين آره ده كابل ده گي پلچرخي قماق خانه سيده آليب باریله دی

اونينگ مدافعه وكيللري محكمه نينگ توزيك بيرشكلده آليب بارلمه گني شو باعث محكمه قراريگه قرشي چيققن لريني ايتگن.

جناب شاو ايشله ياتگن جي فور اس خوف سيزليك تشكيلاتي گه كوره شاو و اونینگ افغان همكسبي عدالتلي بيرشكلده محاكمه بولمه گن