جوزجان ولایتیده یوز بیرگن توقنه شوده ایککی تمان هم تلفات کورگن

محلی رسمیلرنینگ خبرقیلیشلریچه توقنه شو جوزجان ولایتی نینگ درزاب ولسواللیگیده افغان وطالبان کوچلری آره سیده روی بیریب، نتیجه ده ایککی افغان عسکری و اون قوراللی طالب هلاک بولگن.

جوزجان ولایتی نینگ امنیه قوماندانلیگی نینگ خوف سیزلیک مسوولی محمد ابراهیم قریب اوچ ساعت دوام تارتگن آتیشمه ده افغان عسکرلریدن بیش کیشی و ایککی طالب قوراللی لرینی هم تن جراحتی کوتارگنینی معلوم قیلگن.

اونی معلوم قیلیشیچه ایککی نامزد نماینده سی صفتیده وظیفه الیب باره یاتگن ایککی کیشی سیلاو الدی ترغیباتلری اوچون درزاب تومنیده سفرقیلگن ایکن، طالبلر قوراللی لری ایسه سیلاو آلدی ترغیباتلری اوچون بارگن ایککی نماینده نی تیرگاوگه آلگنیدن سونگ توقنه شولر باشلنگن.

شوندی بولسه هم افغان کوچلری طالبلر تمانیدن حبسگه آلینگن شخصلرنی ازاد ایتیشگه قادر بولمه گنلر.

جوزجان ولایتی نینگ محلی رسمیلری اوشبو ایککی کیشی نینگ قویب یوباریش اوچون قیدروعملیات لر یولگه قویلگن لیگینی تاکیدله گن.لیکن اولرنینگ قندی احوالده بولگنی باره سیده معلومات بیرمه گنلر.

اما طالبلر گروهی حاضرگه چه بوخصوصده قندی مناسبت بیلدرمه گن.

بوندن بیرهفته آلدین هم درزاب ولسواللگیده سفرقیلگن زراعت خادملریدن ایککی کیشی طالبلر قوراللی لری تمانیدن تیرگاوگه آلنیب، قوم باشلیغلری نینگ سعی حرکتی بیلن اوچ کوندن سونگ قویب یوباریلگندی.

جوزجان ولایتی نینگ درزاب وقوشتپه ولسواللیک لریده طالبلر قوراللی لری نینگ فعالیتی کوپلب کوزه تیلگنی ایتیلیب کیلماقده.

عینی حالده محلی رسمیلر اوشبو حدودلرده خارجی طالبلرهم موجودلیگینی تاکیدله گنلر.