اوزبیک جنگرلری افغان پلیس اداره سیگه هجوم قیلگن

Image caption اوزبیکستان اسلامی حرکتی رهبری طاهر یولداش نینگ جنوبی وزیرستانده گی امریکالیکلرنینگ هوا هجومیده اولدیرلگنی خبر قیلنگن.

افغانستان رسمی لری قندوز ولایتده بیر پلیس خادمی داخل اوچ کیشی هلاک بولگن هجوم اوچون اوزبیکستان اسلامی حرکتی مسئول ایکنینی ایتیشگن.

رسمیلرگه کوره، علی آباد تومنیده گی حادثه ده ناتو کوچلری ایککی جنگرینی اولدرگن.

فرانس-پرس خبر آژانس نینگ تومن حاکمی حسیب الله محتشمدن اقتباس کیلتریشچه ، عصیانچی لر تومن پلیس اداره سینی شنبه کونی کیچ ساعتلرده هجومگه توتیشگن.

هجومده بیر افغان پلیسی خادمی هلاک بولگن.

ناتو نینگ بیلدریشچه، اتفاق کوچلری جنگری لر اوتیرگن یوک موترنی هوا دن نشانگه آلگن و ایککی جنگرینی اولدیرگن.

اولردن بیری نینگ اوزبیکستان فقرا سی ایکنی ایتله دی .

ناتو گه کوره ، هجومگه اوزبیکستان اسلامی حرکتی نینگ قوماندانلریدن بیری باشچیلیک قیلگن.

اتفاق کوچلری نینگ بیلدریشچه، اوزبیک جنگری گروهی شونینگ دیک ، منطقه ده گی ینه بیر حدودگه قورال-یاراغ ایتکزیب بیرگنی معلوم.

نسبتا تینچ بولگن افغانستان شمالیده سونگی پیتلرده عصیانچیلرنینگ هجوملری کوچیگن.

اوتگن هفته قندوز ولایتی رسمی لری اوزبیکستان اسلامی حرکتی نینگ اوچ نفر اعضا سی حبسگه آلینگنینی معلوم قیلشگن.

محلی پلیس باشلیغی اولرنینگ تاجیک فقرا لری ایکنی و پاکستان بیلن چیگره ده گی میرانشا منطقه سیده تیارگرلیکدن اوتگنلیکلرینی ایتگن.

1998 ییلیده تشکیل تاپگن و جمهور رئیس اسلام کریموف حکومتیگه مخالفتده بولگن اوزبیکستان اسلامی حرکتی طالبان باشقه روی دوریده افغانستان شمالیده اوزی نینگ قرارگاه گه ایگه بولگن .

امریکا اوزبیکستان اسلامی حرکتنی 2000 ییلیده ترورچی تشکیلاتلر رویخطیگه کیرتگن و امریکا باشچیلیغی ده گی اشغال آرتیدن اوزبیک جنگری لری افغانستان دن چیقرلگن.

گروه افغان-پاکستان چیگره سیده هنوز فعال ایکنی ایتله دی .

اوزبیکستان اسلامی حرکتی رهبری طاهر یولداش نینگ اوتگن ییلی اگوستده جنوبی وزیرستانده گی امریکالیکلرنینگ هوا هجومیده اولدیرلگنی خبر قیلنگن.

بیراق پاکستان ایچکی ایشلر وزیرلیگی اونینگ اولیمنی تصدیق لاوچی قطعی دلیللر یوقلیگنی ایتگن.