اهالی کابل بانکدن پوللرینی چیقارماقده

Image caption -کابل بانک نینگ اساسی شبعه سی تشقری سیده کتته سانده گی اهالی توپلنگن.

افغانستان نینگ اینگ ییرک تجاری بانکی-کابل بانک نینگ اساسی شبعه سی تشقری سیده کتته سانده گی اهالی توپلنگن.

اولر اوتگن هفته بانک نینگ ایککی باشقروچی سی استعفا گه چیقیشی و قلاب لیکلر حقیده گی خبرلر آرتیدن پوللرینی قیتریب آلیشماقده.

اما افغانستان مرکزی بانکی رهبری عبدالقادر فطرت بی بی سی بیلن صحبتده بانک تفتیش قیلنمه یاتگنی و مشتری لرنینگ خواطرلریگه اورین یوق لیگنی ایتگن.

بانک دن پوللرینی آلیش اوچون باره یاتگن آدم لر سانی کوندن-کونگه کوپیماقده.

بوگون ییرتلب بانک نینگ کابل ده گی اساسی شبعه سیده آدم لر نوبتگه تیزلیشگن.

پلیس بانک نینگ آلدینی سیم تور لر بیلن اوره ب آلگن و یول حربی یوک وموترلری بیلن توسیب قوییلگن.

مشتری لرگه اینگ کوپ اون مینگ دالر آلیش ممکن لیگی ایتیلدی.

اولردن بیری میرویس اچکریگه کیریب، حسابیدن پول چیقاریب آلیش اوچون تورت ساعت کوپراق نوبتده تورگن.

"بیز پوللرمیزنی چیقاریب آلیش اوچون کیلگن میز، چونکی هیچ کیم نینگ بانککه ایشانچ قالمه گن"، دیب ایتدی کابل بانک مشتری لریدن میرویس.

حکومت آدم لرنینگ خواطرلریگه اورین یوق و مطبوعات بانک نینگ معما لرینی بورتریب کورستماقده ، دیماقده.

مرکزی بانک ریئسی عبدالقادر فطرت بی بی سی بیلن صحبتده نوبتده تورگن آدم لر سانی عادتده گیدن کوپراق ایکنینی ایتدی.

اونینگ ایتیشچه ، کوپچیلیک افغانلر اوزلری نینگ معاش لرینی عیدالفطر-حیت بیرمیدن اول ساوغه –سلام آلیش اوچون پوللرینی چیقاریب آلیشماقده.

عینی پیتده امریکا مالیه وزیرلیگی قرضگه باتیب قالگنی دعوا قیلنه یاتگن کابل بانکنی کفیللیکه آلگنی حقیده گی خبرلرنی رد ایتگن.