کرزی نینگ بدخشانگه سفری و القاعده اعضا سی نینگ قولگه آلینگنی

Image caption افغانستان جمهور ریئسی حامد کرزی بدخشان ولایتیده عملگه آشیرلگن ایجابی ترقیاتنی آلقیشله گن.

افغانستان جمهور ریسی حامد کرزی بوگون مملکت شمال شرقیده گی بدخشان ولایتگه باریب او ییرده ینگی قوریلگن بیر یولنی آچلیش مراسمیگه قتنشگن.

کرزی جنابلری بدخشان ولایتده سونگی بیش ییل ایجده یوز بیرگن اوزگریش لرنی ایجابی بهالب ، بدخشان ننیگ ایرم ولسوالیک لری یوللرنی قیته قوریشگه وعده بیرگن.

حامد کرزی جنابلری بدخشان ولایتده، اوشبو ولایت مرکزی فیض اباد شهرنی کشم ولسوالیگی بیلن باغلوچی ینگی یولنی آچلیش مراسمده قتنشدی.

امریکا حکومتی تمانیده مالیه لنه یاتگان 105 کیلو مترلیک یول یقنیده قوریب بیتکزلیشی کوتیلماقته.

اوشبو یولنی قیته قورلییشی بیلن بدخشان ولایتی کیشم ولسوالیگی اهالی سینی یول بویچه بولگن کوپلب معمالری حل بولییشی کوتیلماقته.

کرزی جنابلری بدخشان ولایتده سونگی بیش ییل ایچده یوز بیرگن اوزگریش لردن راضی ایکن لیگی نی ایتدی، اما او بدخشانده گی ایجابی اوزگریش لر نیمه لردن عبارت ایکن لیگی حقیده انیق توختلمه دی.

حامد کرزی بدخشان ولایتده گی نسبی تینچلیک شرایط دن خرسند چیلیک بیلدرب اوشبو ولایتده تینچلیک نی برقرار قالیشی اوچون قولدن کیلگن سعی و حرکت لرنی قیلیشگه تیار ایکن لیگی نی اورغوله دی.

افغانستان جمهور ریسی حامد کرزی یقین کیله جکده، بدخشان ولایتی مرکزی فیض اباد شهری و بهارک ولسوالیگی آره سیده گی 70 کیلو مترلیک یول هم اسفالت له نیشی نی ایتدی.

افغانستان نینگ تاغلی بدخشان ولایتی نینگ کوپلب ولسوالیک لرینی یولی ابگار بیر حالت ده ؛ خصوصا قیش فصلیده یوللرنی یاپلیشی منطقه اهالی سینی کوپلب قیندچیلیک لرگه دوچار ایته دی.

شونینگ دیک حامد کرزی، بدخشان ولایتی نی برق قوتی بیلن تامین لش اوچون کوکچه دریاسی اوستیگه برق توغانی قوریش کیرک لیگی نی هم اورغولب اوتدی.

القاعده اعضا سی قولگه کیرتیلدی

افغانستان جمهور رئیسی حامد کرزی مملکت شمال شرقیگه سفر قیلرایکن ، طالبان عصیانکارلری فعالیتلرینی آلدینی آلیش اوچو ایککی حربی عملیات کندوز ولایتده یولگه قوییلگن.

محلی رسمی لرگه کوره ناتو و افغان کوچلری تامانیدن عملگه اشیرلگن حربی عملیات نتیجه سیده اوچ کیشی قوراللی عصیانکار هلاک بولگن.

کندوز ولایتی رسمی لر افغان کوچلری تمانیدن ایری بیر عملیات نتیجه سیده القاعده بیلن علاقه سی بولگن ایککی کیشی نینگ قولگه کیرتلگنینی معلوم قیلگنلر.

قولگه آلینگن مولوی شمس الدین مخبرلر بیلن قیلگن صحبتیده ، القاعده گروه بیلن علاقه سی بارلیگنی اعتراف قیلگن.

مولوی شمس الدین کندوز ولایتده گی القاعده گروه باشقروچی سی بولگنینی مخبرلرگه معلوم قیلگن.

ایککینچی شخص ایسه مولوی شمس الدین نینگ یاردمچی سی بولگنی ایتلماقده .

بوندن اول هم کندوز ولایتده یولگه قوییلگن حربی عملیات نتیجه سیده القاعده گروهی بیلن علاقه سی بارلیگی گمان قیلنگن بیرنفر قولگه آلینگندی.

کندوز ولایتی افغانستان شمال شرقده گی اینگ ناقرار ولایت لردن بیری حساب لنه دی.