یتتی یوزدن آرتیق عصیانچی قولگه آلینگن

افغانستان مدافعه وزیرلیگی گه کوره اوتگن بیر آی جریانیده یتتی یوزدن آرتیق افغان وخارجی عصیانچیلر حبسگه آلینگن.

افغانستان مدافعه وزیرلیگی نینگ سوزچیسی جنرال ظاهر عظیمی 732 عصیانچی نینگ یولگه قویلگن حربی عملیات لر نتیجه سیده افغانستان نینگ تورلی منطقه لریدن قولگه آلینگن لیگینی ایتدی.

اونگه کوره قولگه آلینگن عصیانچیلر آره سیده بیرقنچه خارجی عصیانچیلر هم موجود بولگن، همده توتیلگن عصیانچیلردن بیرقنچه سی طالبان نینگ محلی قوماندانلریدن عبارت بولگن.

اما عظیمی جنابلری توتیلگن خارجی عصیانچی لرنینگ قیسی اولکه لر وطنداشی ایکن لیگی باره سیده آچیق معلومات بیرمه دی.

باشقه تماندن مدافعه وزیرلیگی ایسه سونگی پیتلرده افغانستان نینگ شمال وشمال شرقی حدودلریده عصیانچیلر فعالیتی کوپیگنینی ایتیب اولرمابینده خارجی عصیانچیلر هم بارلیگینی تصدیق له دی.

عینی حالده افغانستان مدافعه وزیرلیگی شمالی منطقه لردن عصیانچیلرنی یوق ایتش اوچون شدتلی حربی عملیات لر یولگه قویلشینی اورغوله دی.

بوندن بیرکون الدین هم بلخ ولایتی نینگ حاکمی عطا محمد نور شمالی ولایتلرده عصیانچیلرنی فعالیتی کوپیگنی باره سیده خواطیر بیلدرب خارجی حربی لر عصیانچیلرگه قرشی عملیات اوتکزیشده ایرکین ایکن لیک لرینی اورغوله گن ایدی.

ایریم کوزه توچیلر گه کوره خارجی عصیانچی لر تاجکستان بیلن چیگره داش بولگن ایریم ولسواللیک لرده انچه فعال بولگن اولرنی معلوم قیلیش لریچه اگرده بو کبی فعالیت لر آلدی آلینمه سه نه فقط افغانستان بلکه اورته آسیا دولت لری اوچون هم معما توغدریشی ممکن