تخارده طالبلرودولت کوچلری اره سیده توقنه شولردوام ایتماقده

افغانستان شمال شرقیده جایلشگن تخار ولایتی نینگ خواجه غار تومنیده طالبلر و افغان کوچلری اره سیده یوزبیریب کیله یاتگن توقنه شولر ده کمیده ایککی عصیانچی هلاک بولگن.

شونینگ دیک محلی رسمیلر ایککی پلیس نینگ یره لنگنینی تصدیق له گن. پلیس نینگ بیری عینی ولسواللیکده یول چیککه سیده اورنه تیلگن ماین پارتلش عاقبتیده یره لنگن.

تخار ولایتی نینگ ولایت حاکمی سوزچیسی فیض محمد توحیدی هلاک بولگن عصیانچی لرنینگ بیرینی چیت ایللیک بولیشی ممکن لیگینی ایتیب لیکن توقنه شولرنینگ سونگی تفصیلاتی حقیده تولیق معلومات بیرمه گندیر، تخار ولایتی نینگ بعضی بیرمنطقه لریده اوزبیکستان اسلامی حرکت اعضالرینی هم بارلیگی تاکیدلنماقده.

خواجه غار ولسواللیگی تاجکستان بیلن چیگره داش بولیب سونگی پیتلرده انچه ناتینچ بولگن.

هرچند افغان حکومتی الدینلر یولگه قویلگن قوشمه عملیات لر طفیلی چیگره حدودلریده جایلشگن طالبان عصیانچی لری نینگ مغلوبیتگه اوچره گنینی ایتگن ایدی لیکن خواجه غار تومن اهالیسی اوشبو ولسوالیکنی قشلاق منطقه لریده طالبان قوراللی لری نینگ انچه فعال بولگنیدن جدی خواطر ده بولگن لر.

شمالی حدودلرده عصیانچیلر فعالیتی نه فقط اهالی بلکه رسمیلر شونینگ دیک امریکا کوچلرینی هم خواطرلنترگن. بوندن ایککی کون مقدم امریکا قوشمه قوشینلر باش قوماندان مایک مولن کابل گه بولگن سفریده عصیانچی گروه لرنینگ شمالی ولایت لرده ارتیب باره یاتگنیدن خواطربیلدیرگندی.