مزار شریف شهریده گی هجوم ، کینگ بیر شکلده محکوم بولدی

Image copyright BBC World Service
Image caption هجوم چیلر ، بیرلشگن ملت لر تشکیلاتی ایشلاوچی لری ، ایککی کیشی سی نینگ باشی نی کیسگن لر.

بیرلشگن ملت لر تشکیلاتی نینگ باش وکیلی بانکی مون ، مذکور تشکیلات مزار شریف شهریده گی دفتریده یولگه قوییلگن قانلی هجوم نینگ محکوم قیلگن.

جمعه کونی بیر قنچه مزارلیک لر ، امریکا فلوریدا ایالتیده ، قرآن شریف نینگ یاندیریلگنی اوچون ، ناراض لیک نمایش لر یولگه قوییب ، ناراض کیشی لر نینگ بیر قنچه سی ، بیر لشگن ملت لر تشکیلاتی نینگ دفتریده هجوم قیلیب ،8 کیشی نینگ اولدیردیلر.

بانکی مون ، کنیا ده سفری بولگن بیر حالده ، بیر لشگن ملت لر تشکیلاتی نینگ ایشلاوچی سی گه قرشی یولگه قوییلگن هجوم نینگ ، بزدل لیک دیب ، هیچ قنده ی شرایطده ، قبول بولمه یدگن بیر عمل دیب معلوم قیلگن.

مذکور حادثه ده ، بیر سویدن لیک ، بیر نرویژ لیک ، بیر رومانیالیک شو نینگ دیک ، بیرلشگن ملت لر تشکیلاتی نینگ مزار شریف نمایند لیگی ده گی تورت نیپالی قوریقچی لری ، هلاک بولیب ، اوشبو دفتر نینگ بیر قسمی هم یاندیریلگن لیگی ایتیلگن.

آسوشیتید پرس آژانسی ، بلخ ولایتی نینگ پولیس مقام لری نینگ بیریدن نقل قیلیب ، مذکور حادثه ده 20 کیشی دن کوپراق ، قوشیمچه ، بو هجوم نینگ طرح قیلگن کیشی بیلن اوشلب آلینگنینی ترقه تگن.

شو نینگ دیک ، هجوم اویشتیرگن و اعتراضی بولگن نیچه کیشی هم بیر لشگن ملت لر تشکیلاتی نینگ قوریقچی لری تمانیدن هلاک ایتیلگن.

باشقه تماندن ، ناتو کوچلری ، بیر قنچه عصیانچی لر تمانیدن یولگه قوییلگن گروهی هجوم نینگ کابلده دفع قیلیشی دن خبر بیرگن لر.

ناتو نینگ اعلام قیلشیچه ، ایککی عصیانچی ، مذکور کوچلر حربی قرار گاهیده کیرماقچین بولیب لیکن اوریش لر نتیجه سیده ، هجومچی لر هلاک بولگن لر.

مذکور اوریش نتیجه سیده ، ناتو کوچلری نینگ اوچ کیشی سی هم یره لنگن لیگی ایتیلگن.

بیر لشگن ملت لر تشکیلاتی نینگ تینچلیک کینگاشی ، مزار شریف ده یولگه قوییلگن هجوم خصوصیده اضطراری بیر جلسه یولگه قویگنیدن خبر بیریب ، اوشبو حادثه نینگ ، بیر بیانات آرقه لی محکوم قیلگن و بو حادثه عامل لری نینگ ، محکمه بولیشی نی طلب قیلگن.

امریکا جمهور رییسی باراک اوبا هم ، بیر بیانات آرقه لی ، بیرلشگن ملت لر تشکیلاتی ایشلاچی لری گه قرشی هجوم نینگ محکوم قیلیب ، هلاک بولگن لر عایله سیده ، همدرد لیک بیلدیرگن.

شو نینگ دیک ، بیرلشگن ملت لر تشکیلاتی نینگ افغانستانده گی وکیلی استیفن دیمستورا ، مزار شریف واقعه سی نینگ تیکشیریش اوچون ، بو شهرده کیتگن لیگی ایتیلگن.

باشقه تماندن ، امریکا قوشمه ایالت لری نینگ تشقی ایشلر وزیری ، هیلاری کلینتون ، بیر بیانات آرقه لی ، بیرلشگن ملت لر تشکیلاتی ایشلاوچی لری نینگ هلاک بولیشی نی محکوم قیلگن.

امریکالیک کشیش نینگ عکس العملی

جمعه کونیده گی ناراض لیک نمایش لر ، امریکا فلوریدا ایالتی نینگ بیر کشیشی تری جونز تمانیدن قرآن شریف نینگ یاندیریلگنیده قرشی لیک کورسه تیش مقصدیده یولگه قوییلگن ایدی.

بو کشیش گه کوره ، قریب ایککی هفته آلدین ، قرآن شریف نینگ محکمه قیلیش مقصدیده ، پیرو لری نینگ آلدیده ، قرآن شریف نینگ یاندیرگن.

تری جونز ، جمعه کونی بیر بیانات آرقه لی ، اسلام گه قرشی موضع سیده تاکید قیلگن.

باشقه تماندن ، امریکا و اسلام رابطه سی نینگ کینگاشی هم بیر بیانات آرقه لی مزار شریف شهریده گی واقعه نینگ محکوم قیلگن. مذکور کینگاش امریکاده گی اسلامی مهم گروه لریدن تشکیل ایتیلگن.

عین زمانده ، امریکا سنا مجلسی خارجی رابطه لر کمیته سی نینگ رییسی جان کری ، هم تری جونز نینگ افراطی بیر چهره دیب ، مزارده قربان بولگن لر بو کشیش بیلن هیچ قنده ی رابطه لری بولمه گنینی ایتگن.

Image caption تری جونز ، مزار شریف ده یولگه قوییلگن هجوم خصوصیده ، عکس العمل کورسه تیب ، ینه اسلام گه قرشی هجوم اویشتیریشی نی ایتگن

باشقه تماندن ، بلخ ولایتی نینگ مقام لری ، مزار شریف شهریده گی ناراض لیک نمایش لر ، بیر قنچه فرصت طلب کیشی لر تمانیدن ، خشونت لی بولگنی نی ایتگن لر.

شمال ده گی پولیس کوچلری نینگ سوزچی سی ، لعل محمد احمد زی ، بی بی سی بیلن بولگن صحبتیده ، بیر لشگن ملت لر تشکیلاتی 8 خارجی ایشلاوچی سی نینگ هلاک بولگنی و مذکور دفتر نینگ بیر بولیمی و ماشینه لری یاندیریلگن دیب معلوم قیلگن.

احمدزی جنابلری ، ناراض کیشی لر هم مذکور نمایش ده تلفات کورگنینی معلوم قیلیب لیکن انیق رقمی حاضر گه قدر بیلی ایمس دیدی.

مخبر لر گه کوره ، ناراض لیک نمایش لر یولگه قویلیشی دن آلدین ، افغان روحانی لریدن بیری ، سوزگه چیقیب ، قرآن شریف نینگ یوزلب جلدی نینگ یاندیریلگنینی ایتگن.

تری جونز فقط قرآن نینگ بیر جلدی نی اوتگه آلگنی نی ایتگن.

بو امریکالیک کشیش ، نیچه آی آلدین ، قرآن نینگ کویدیرماقچین ایدی ، لیکن امریکا نینگ عمومی فکری همده دولتی مقام لری نینگ مخالفتی بیلن یوزمه یوز بولدی. اوزمان بو کشیش موقت بیر شکلده مذکور تصمیمی دن واز کیچگنیدن سوز یوریتگن ایدی.

خبرنگار لر بلخ ولایتیده گی ناراض لر سانی نینگ مینگ لب کیشی اعلام قیلدیلر.

عین زمانده ، امریکا لیک کشیش تمانیدن قرآن شریف نینگ اوتگه آلینیشیگه قرشی ، هرات اهالیسی هم ناراض لیک نمایش لر یولگه قویدیلر.