طالبان قوم باشلیغ لریدن بیری نینگ جسدیگه اوت قویگن

پلیس مقاملریگه کوره طالبان عصیانچیلری شمالی سرپل ولایتیده قوم باشلیغ لریدن بیری نینگ هیدوچیسی بیلن بیرگه اولدریب کینچه لیک اولرنینگ جسدلریگه اوت قویگن.

شمال حوزه سی نینگ پلیس باشلیغی ژنرال داود دواد بی بی سی بیلن بولگن صحبتیده اوشبو قوم باشلیغی نینگ بوندن اوچ کون الدین طالبلر تمانیدن سرپل ولایتی نینگ گوسفندی منطقه سیدن اوغرلنگنینی ایتدی.

اونگه کوره قوراللی طالبان بو ایککی شخص نی اولدریب کینچه لیک اولرنینگ جسدلریگه اوت قویگن و اوچ کون هم اوزلرنی الدیگه سقله گن.

محلدن کیلگن خبرلرگه کوره طالبان عصیانچیلری، منطقه ده کی قوم باشلیغلرنی واسطه چیلیگی اساسیده اوشبو جسدلرنی یقین قرینداشلریگه تاپشرگن.

ایتیلیشچه قوم باشلیغی بیلن بیرگه اولدریلگن شخص بوندن آلدین طالبان نینگ محلی قوماندانلریدن بیری داخل سککیز قوراللی طالبنی هلاک ایتگن ایکن.

شونگه قوشیمچه ژنرال داود داود اوز بیاناتیده اولدریلگن قوم باشلیغی نینگ طالبان پول الیشی مقصدی بیلن اوغرله گن ایکندیب فکر بیلدرگن.

داود جنابلری بو عمل طالبان نینگ محلی قوماندانلریدن بیر تمانیدن اوشتریلگن دیب اونی قولگه کیرتیش اوچون سعی حرکت لر بوله یاتگنیدن خبربیرگن.

طالبان گروهی حاضرگه چه بو خصوصده هیچ قندی مناسبت بیلدرمه گن.

هرچند بوندن الدین هم قوم باشلیغ لرینی طالبان تمانیدن نشانگه الینیشی کوزه تیلگن لیکن، بیرینچی مرته دیرکه طالبان قوم باشلیغ لریدن بیرنی اولدریب کینچه لیک اونینگ جسدیگه اوت قویه دی.