بوکونکی یوزبیرگن ناقرار لیک لر

افغانستان جمهورریسی نینگ اورین باسری و ایچکی ایشلر وزیری راکت هجومیدن امان قالگن. یوقاری مرتبه لی بو ایککی مقام وردک ولایتده کی سفری جریانیده هجوم گه توتیلگن.

افغانستان جمهور رییس اورین باسری وایچکی ایشلر وزیری، وردک ولایتیده پلیس تربیه لاوچی مرکز نینگ اچیلیش مراسمده اشتراک ایتش مقصدی بیلن اوشبو ولایتده سفر قیلگن ایکن.

طالبان عصیانچیلری تمانیدن افغان خادملرینی نشانگه الیش واقعه لری کوپلب کوزه تیلیب کیلماقده. لیکن، بوقدر یوقاری مرتبه لی خادملر نینگ عصیانچیلر تمانیدن نشانگه النیشی کمراق کوزه تیلگن.

افغانستان جهورریسی نینگ ایککینی اورین باسری محمد کریم خلیلی و ایچکی ایشلر وزیری جنرال بسم الله محمدی وردک ولایتی نینگ چاکی تومنیده کی پلیس تربیه لاوچی مرکز نینگ اچیلیش مراسمده حصصه قوشیشی مقصدی بیلن سفر قیلگن ایکن.

مراسم توگه گندن کیین بیر نیچه دقیقه اوتیب اوتمس عینی منطقه راکت اوقی بیلن نشانگه الینگن.

ایچکی ایشیلر وزیرلیگی نینگ سوزچیسی صدیق صدیقی راکت اوقی پلیس مرکزی نینگ تالاری یقینده اصابت قیلگنینی ایتیب. اوشبو حادثه ده هیچ کیم گه قندی دیر خساره وتلفات ایتکزیلمه گنینی ایتدی.

میدان وردک ولایتی پایتخت کابل بیلن قوشنی بولیب سونگی پیتلرده انچه ناتینچ بولگن. کابل وقندهار شاه یولی هم اوشبو ولایت مرکزیدن اوته دی.

باشقه تماندن صدیقی جنابلری. کابل شمال شرقیده جایلشگن کاپیسا ولایتیده یوزبیرگن انتحاری هجومده اوچ پولیس عسکری قوشیمچه سککیز کیشی نینگ قربان بولگنینی تصدیق له دی.

همده اوشبو انتحاری هجومده بیر پلیس و آلتی عادی اهالی نینگ یره لنگنینی هم معلوم قیلدی.

طالبان عصیانچیلری اوشبو انتحاری هجوم مسوولیتینی اوز بوینگه الگن هجومدن مقصد فرانسه دولتی نینگ کابلده کی ایلچیسی و فرانسه لیک عسکر لر ایکنینی معلوم قیلگن.

هجوم یوزبیرگن پیتی، فرانسه ایلچیسی کاپیسا ولایتی نینگ ایشخانه سیده ایکن.

فرانسه نینگ کابلده کی ایلچی خانه سی فرانسه ایلچی سی کاپیسا حاکمی بیلن اوچره شیش مقصدی بیلن اوشبو ولایت ده سفر قیلگنینی معلوم قیلگن.

باشقه تماندن افغانستان ملی استخبارات اداره سی جنوبی قندهار ولایتیدن انتحاری هجوم اویشتریشینی مقصد قیلگن بیرشخصنی توتیلگنینی ایتیب اونی ایرانلیک ایکنینی تاکیدله گن.