اولوسی جرگه نینگ اونلب نماینده سی صلاحیت سیز بولماقده

Image copyright AP

پارلمان سیلاولری نینگ تیکشیروچی مخصوص محکمه، اولوسی جرگه نینگ اونلب نماینده سینی صلاحیت سیز اعلام قیلگن.

اوشبو محکمه نینگ اعلام قیلیشیچه، اولوسی جرگه نینگ حاضر گی ملت وکیل لری نینگ 61 کیشی سی سیلاو لر قلاب کار لیک قیلیب اوشبو کینگاشده کیرگن لر.

مخصوص محکمه نینگ رییسی صدیق الله حقیق، اوشبو محکمه تمانیدن، سیلاولر قلاب کارلیگیده قول لری بولگن اولوسی جرگه ده گی حاضر گی ملت وکیل لر همده ناراض نامزد وکیل لر، محکمه ده استناف طلب قیلیش حقیگه ایگه بولگنی نی هم معلوم قیلگن.

حقیق جنابلری، پنجشیر و بامیان ولایت لریده هیچ قنده ی شکایت یوق لیگیدن سوز یوریتیب، شو نینگ دیک، مخصوص محکمه تمانیدن کاپیسا، ارزگان، نیمروز، دایکندی، کنر و پروان ولایت لریده یولگه قوییلگن تیکشیریش ایشلری نتیجه سیده، هیچ قنده ی اوزگریش لرنی کورسه تمه گنلیگی نی ایتدی.

لیکن، بو حالتده قرگنده، سیلاولر قلاب کارلیگی نینگ تیکشیروچی کمیسیون ایسه سیلاولر نهایی نتیجه سی توغری سیده مخصوص محکمه تمانیدن اوزگریش لر کیلتیریشنی مملکت باش قانونی و سیلاولر قانونی گه بناً قرشی بیر عمل دیب معلوم قیلگن.

شونده ی بیرحالده، سیلاولر نهایی نتیجه سیدن ناراض بولگن نامزد وکیل لردن احمد خان سمنگانی ایسه، مخصوص محکمه اونینگ رأی لری نی قیته دن سنه ب، اولوسی جرگه ده یول تاپیشی توغری سیده خرسند لیک بیلدیریب، حق، حقداریگه ایتیشگنی نی معلوم قیلدی.

اما باشقه تماندن، حاضر گی ملت وکیل لر ایسه مخصوص محکمه نینگ اعلام ایتگن نهایی قراری نی قانونگه بناً قرشی بیر عمل دیشماقده لر.

اوشبو ملت وکیل لر مخصوص محکمه قانون سیزلیک بیر شکلده جمهور رییس کرزی تمانیدن ایجاد ایتیلیشی و او نینگ ایستک لری دیک عمل قیلیشی نی ادعا قیلماقده لر.

فاریاب ملت وکیل لریدن خانم آصفه شاداب نینگ ایتیشیچه، ملت وکیل لر مخصوص محکمه نینگ مذکور قرارینی قبول قیلمه یدیلر.

اولوسی جرگه روی خطی دن مملکت نینگ 27 ولایتی دن اونلب نماینده مخصوص محکمه تمانیدن چیقریلیشی، افغانستان نینگ سیاسی بحرانگه ایلنتیریش خواطرلرنی کوچه یتیرگن.

مخصوص محکمه تمانیدن، سیلاولر نهایی نتیجه سی تیکشیریش ایشی اعلام بولیشی بیلن همزمان، مملکت باش قاره لاوچیسی اولوسی جرگه اعضا لری تمانیدن غیابی بیر شکلده صلاحیت سیز قیلینگن.

افغانستان سیلاولر قانونی گه کوره، سیلاولر نینگ نهایی نتیجه سی، سیلاولر کمیسیونی نینگ صلاحیت لریدن بولیب، مخصوص محکمه دیگن بیر نهاد ده هیچ قنده ی صلاحیت بیریلمه گن.

حال بوکه مملکت اولوسی جرگه وضعیتی قنده ی بوله دی؟ زمان اوتیشی بیلن انیق بولیشی کوتیلماقده.