لوگر کسل خانه سیده قیلینگن هجوم 60 کیشی نی نابود قیلدی

Image copyright BBC World Service

افغانستان نینگ لوگر ولایتیده گی کسل خانه سیده اویوشتیریلگن خودکش لیک هجومده کمیده 60 انسان هلاک بولگن. افغان رسمی لری معلوماتیگه کوره، پارتله شده ینه اونلب آدم لر جراحت آلیشگن، بعضی لری نینگ اوته آغیر. هلاک بولگن لرنینگ اکثر عادی فقرا لر بولگن لیگی ایتیلگن. جنگری لر تیز تیز افغانستان دولتی ایشچیلری نی، همده خارجی قوشونلرینی نشانگه آلیشه دی. رسمی لر هجوم آرتیده طالبان تورگنلیگینی ایتماقده، بیراق طالبان واعظی اوز گروه جماعت جایلرگه هجوم قیلمسلیگی نی ایتگن و پارتله شنی "اوز مقصد لریگه ایگه بولگن کیمدیر" عملگه آشیریلگنینی دعوا قیلگن. لوگر والی سی نینگ سوز چیسی، دین محمد درویش قربان لر سانی آرتیشی ممکن لیگی، کوپلب، آدم لر حلی هم مخروبه لر آستیده قالیب کیته یاتگنینی بیلدیردی. قوتقروچی گروه لر پارتله ش صحنه سیگه یتیب کیلیب، کومیلیب، قالگن آدم لرنی چیقریب آلیشگه اورنگنلیگی ایتیلماقده. ازره تمانیده گی بو کسل خانه گه کوپ سانلی آدم لر هفته لیک معالجه اوچون یغیلگن ایدی. اولرنینگ کوپی عیال لر و باله لر بولگن. "پارتله ش نینگ نشانی کیم بولگنی انیق بولمه گن، بیراق عیناً کسل خانه نشان گه آلینگنی و عادی انسان لر نابود بولگنی بیللی بولگن،" دیدی جناب درویش. مذکور قانلی هجوم شمالده گی قندوز ولایتیده، اون کیشی نی اولدیریب، 24 کیشی نی یره له گن پارتله شدن بیر نیچه کون اوتیب صادر بولماقده. چهار شنبه کونی امریکا جمهور رییسی باراک اوباما، افغانستاندن امریکا کوچلری قسماً آلیب چیقیلیشی نی اعلان قیلگن ایدی.