اوزینی کویدیریش واقعه لر کوپه یگن

افغانستان عامه ساغلیک وزیرلیگی، ، جاری ییل ده یوز بیرگن کوییش واقعه لری اوتگن ییل دن کوره، کوپه یگنینی معلوم قیلگن.

اوشبو وزیرلیک، کوییش واقعه لری نینگ آلدینی آلیش کمپاینی نی مملکت بویلب باشله گنی دن هم خبر بیرگن.

عامه ساغلیک وزیری ثریا دلیل، کوییش رقم لری نینگ کوپ گینه سی، ایریم قیین چیلیک لر سببلی، میده باله لر و خاتین قیز لر گه تیگیشلی بولگنی نی معلوم قیلدی.

اوشبو وزیرلیک حساباتی گه کوره، اوتگن ییل 24092 کوییش واقعه مملکت کسل خانه لریگه مراجعت قییلگن، مذکور رقم دن 234 اولیم واقعه یوز بیرگن.

اما جاری ییل نینگ بیش آیی ده 9568 کوییش واقعه سی یوز بیریب، مذکور رقم دن 93 کیشی هلاک بولگن.

عامه ساغلیک وزیری خانم ثریا دلیل نینگ معلوم قیلیشیچه، مذکور کوییش واقعه لر ایریم دلیل لر باعث بولیب یوز بیره دی.

"اوتگن ییل ده 24 مینگ کیشی دن آرتیق کوییش واقعه لری بیز نینگ حساباتی میزگه کیریب و و مداوا بولگن. اوشبو رقم نینگ 12 فایزی اوزی نی کویدیریش واقعه لری دیر. شو نینگ اوزی نی کویدیریش واقعه لری کوپراق عیال لر گه تیگیشلی. بولر خودکش لیک مقصدیده اوز لرینی کویدیرگن لر. بو کویدیریش لر اجتماعی و عایله وی عمیق ریشه لری بار، مذکور عیال لر نینگ عایله اعضا لری تمانیدن زوراوانلیک لر یوز بیرگنی باعث، اولر اوزینی کویدیریشگه مجبور قیلگن لر. دیب ایتدی عامه ساغلیک وزیری خانم ثریا دلیل."

شو نینگ دیک خانم دلیل جاری ییل ده کویدیریش اولیم واقعه لری اوتگن ییل دن کوره، کمیگنی نی ایتدی.

معلومات لرگه کوره، گاز، ایسیق سو، تیل، قزان نینگ پارتله یشی، برق، باروت، کیمیاوی ماده لر، تندور هلاوی و باشقه ماده لر انسان لر نینگ کوییشی ده مملکتده سبب بولماقده.

اما اوزی نی کویدیریش رقمی مملکت نینگ باشقه ولایت لریگه قرگنده، هرات ولایتیده سونگی پیتلرده کوپ یوز بیرماقده.

اوشبو ولایت ساغلیک نینگ سقله ش محلی مقام لری گه کوره، جاری ییل نینگ اوتگن بیش آیی ده هرات کسل خانه لریده، 51 خود سوزلیک واقعه سی یوز بیریب، مذکور رقم نینگ اوچته سی ایرکک لر تمانیدن صورت تاپگن باشقه سی ایسه عیال لرگه تیگیشلی دیر.

اوزی نی کویدیرگن هرات لیک بیر عیال نیگه اوزی نی کویدیرگنی توغری سیده بونده ی حکایه قیله دی.

"حاضر چه لیک بیرآز یخشی من، کوره ی چه نیمه بوله دی. اوزیم نی کویدیردیم. بیر کیشی نی اوییده قیین چیلیک بولسه اوزی نی کویدیریشی یوز بیره دی ده. مین هم اویمگه قیین چلیک باریدی اوزیم نی کویدیردیم. ایش دن چرچپ کیلیب اوخله گن ایدیم که اویمگه نامزدیم کیلگن ایکن. اوبیلن کوریشیدیم باریب نان تیارلیمن دیب باره یاتگن بیر پیت ده اونینگ همشیره سی و آنه سی همیشه گی دیک کوپ یمان گپ لرنی مینگه ایتدیلر. اولر هرکیم نی آلدیگه مینی سوکیب یورر ایدیلر."

عیال لر حق و حقوقی دن حمایت ایتوچی تشکیلات لر ایسه، عیال لرگه قرشی زوراوانلیک لر نینگ آلدینی آلیشی اوچون، رسانه لر، دینی عالم لر، و مسجد لر امام لری یخشی اورین اوینه آله دیلر دیب معلوم قیله دیلر.

شونده ی بیر حالده عیال لر حق و حقوقی دن حمایت ایتوچی خانم آصفه شاداب اوتگن نیچه ییل دن بیری عیال گه قرشی یولگه قویله یاتگن زوراوانلیک لرنینگ آلدینی آلیشی اوچون دولت موفق بوله آلمه گنی نی معلوم قیله دی.

دولتی و خصوصی کسل خانه لرده مراجعه قیلمه گن اوزی نی کویدیرگن کیشی لر، سانی هم انچه کوپ.

عایله لر مابینیده سواد سیزلیک، کم بغل لیک و شونگه اوخشه گن باشقه قیینچیلیک لر باعث، افغانستانده خود سوزلیک رقم لری کوپه یگن.