ناگران لر اوچون ینگی تعلیمی مرکز آچیلماقده

Image copyright BBCPashto.com

افغانستان حکومتی، مملکت ده گی ناگران لر اوچون تعلیم بیروچی بیر مرکز آچماقده.

اجتماعی ایشلر وزیرلیگی نینگ معلوم قیلیشیچه، مذکور مرکز توزه لیشی 20 ملیون افغانی هزینه کوتاریب، هر ییلی قریب 300 ناگران نینگ ایش قیلیش گه قادر قیله دی.

معلومات لر اساسیده، مذکور مرکز کیله سی بیر ییل گه قدر تکمیل بولیب، ایریم مسلکی بولیم لرده ناگران لرنینگ بیرینچی تعلیم بیروچی مرکزی صفتیده ایشی باشلنه دی.

افغانستان ده دوام تارگن اوتیز ییل لیک اوریش لر مینگلب انسان لرنی ناگران قیلیب قویگن. اوشبو معیوب انسان لرنینگ کوپ قسمی یمان بیر حالتده حیات کیچیرماقده لر.

افغانستان اجتماعی ایشلر وزیرلیگی نینگ مقام لریگه کوره، مملکت ده گی معیوب لر اوچون ایلک بار تعلیم بیروچی بیر مرکز آچیلیب، اولر گه تورلی بولیم لرده تعلیم بیریله دی.

مذکور وزیرلیک وزیری خانم آمنه افضلی نینگ معلوم قیلیشیچه، معلول بولیب عالی اوقو لرینی بیتیره آلمه گن کیشی لر هم مذکور تعلیم بیروچی مرکزده خارجی تیل لر و کمپیوتر اوقی آله دیلر.

" بو ییرده هر ییلی قریب اوچ یوز کیشی تعلیم آله دی. البته بیرینچی دن کدر لر گه اورین بیریله دی، معیاری بیر شکلده ریجه لر قوریلیب، اوندن کیین عملی شکلده ایشلر باشلنه دی. شو نینگ دیک کیره ک بولگن بولیم لرده ناگران لرگه تعلیم بیریش باشلنه دی. عین حالده، جامعه نینگ باشقه کیشی لریگه هم خبر بیریله دی کیم، تورلی ساحه لرده ناگران لر بیلن قنده ی برخورد قیلیش کیره ک."

شونده ی بیرحالده راکت اوقی نینگ پرچه لری دن ایاق لری و کوزلری نینگ قول دن بیرگن معلول عبدالحفیظ ایسه، مذکور تعلیم بیروچی مرکز توزه لیشیدن خرسند لیک بیلدیریب، مسلمان لر نینگ مقدس کتابی قرآن کریم نینگ اورگنیشیده امید بیلدیردی.

"مین اوزیم شخصاً اسلامی تعلیم لر اینیقسه شرعیات بولیمیده تعلیم آلیش توغری سیده انچه علاقم بار. لیکن حاضر گه قدر بیزگه بو نده ی بیر زمینه ایجاد ایتیلمه گن. مین خواه له یمن بیتیرمه گن تعلیم لرنی اوقیب تمام قیلسم. شو نینگ دیک حاضر بیز گه بیران خاص مصروفیت یوق."

موجود حسابات گه کوره، افغانستانده بیر ملیون کیشی دن آرتیق ناگران موجود. مذکور ناگران لر نینگ بیر قسمی افغانستان ایچکی اوریش لری نتیجه سیده معلول بولیب قالگن.

هرچند افغانستان دولتی مذکور ناگران لرگه هر ییلی قریب 20 مینگ افغانی پول توله یدی لیکن اولر نینگ کوپ قسمی قیین بیر شرایطده حیات کیچیریب حتی بیر قنچه سی ایسه، تیلمه چیلیک یا گدایلیگ قیله دیلر.

اوتگن ییل افغانستان حکومتی معلول لر نینگ حقوقی و امتیازی توغری سیده بیر قانون چیقاریب، ناگران لر نینگ قیین چیلیک لری نی برطرف قیلیش اوچون، بوتون وزیرلیک لرنی مکلف قیلدی لیکن شونده ی بولسه هم، مذکور قانون، فقط گینه کاغذ گه یازیلگنی قالیب، جدی بیر شکلده عملی بولمه گن.