غربی حدودلرده یوزبیرگن انتحاری هجوم وپارتلش تلفاتی

افغانستان غربیده جایلشگن بادغیس و هرات ولایتلریده یوزبیرگن انتحاری هجوم وپارتلش نتیجه سیده بیش ملی اردوعسکری داخل اون کیشی قربان بولگن.

رسمی معلومات لرگه کوره غربی بادغیس ولایتی نینگ بالا مرغاب تومنیده کی ساغلیک مرکزی یقنیده ملی اردوکوچلری نینگ موتری کیته یاتگن بیر پیت انتحارچی بیرشخص اوزینی پارتله تگن.

نتیجه ده بیش عادی اهالی قربان بولگن و ایککی عسکر یره لنگن. طالبان عصیانچیلری اوشبو حادثه مسوولیتینی اوز بوینیگه الیب انتحاری هجومده 12 خارجی وافغان عسکری قربان بولگنینی ادعا قیلگن، اما افغان رسمیلری طالبان نینگ بوادعاسینی رد ایتگن.

باشقه تماندن هرات ولایتی نینگ پشتون زرغون تومنیده یول چیککه سیده اورنه تیلگن بیر ماین پارتلش نتیجه سیده بیش افغان ملی اردو عسکری هلاک بولگن.

افغان رسمیلری پارتله گن ماین نینگ عصیانچیلر تمانیدن اورنه تیلگنینی ایتگن.باشقه تماندن افغانستان ایچکی ایشلر وزیری بسم الله محمدی بی بی سی بیلن بولگن صحبتیده یوزبیریب کیله یاتگن ناقرارلیک لرده پلیس تلفاتی کوپ لگیدن خواطر بیلدرگن.

اوتمیش لرده هم عصیانچیلر فعالیتی کوزه تیلیب کیلگن لیکن تینچ منطقه لرده اولرنی فعالیتی کوپیگنی خواطرلرگه سبب بولگن.بوندن الدین خوف سیزلیگی افغان امنیتی کوچلریگه تاپشریلگن اینگ تینچ بولگن پنچشیر تومنیده عصیانچیلر امریکا کوچلری نینگ حربی قرارگاه سیگه قرشی هجوم اویشتریشگه قادیر بولدی همده اوچ کون الدین فاریاب ولایتی نینگ مرکزی میمنه شهریده بیر انتحارچی فاریاب ولایتی نینگ خوف سیزلیک باشلیغی موترینی نشانگه الیب اونی تورت عسکری بیلن بیرگه یره لنتردی. باشقه تماندن خوف سیزلیگی افغان کوچلریگه تاپشریلگن غربی هرات ولایتیده هم ناقرار لیک کولمی کوپیگن.