عالمدن اوتگن ياش شاعره كبراكيوان دن خاطرلش احتفالي بوليب اوتگن

يقينده ميمنه شهريده فارياب ولايتي خاتين- قيزلررياستي وگوهرشادبيگيم مدني تشكيلاتي تشبثي بيلن مرحومه كبرا كيوان ني ايسلش واعزازلش اوچون اونلب عيال وايركك لردن عبارت بولگن اوستاذلر، طلبه لر، مدني تشكيلات لراعضالري بيرقطاردولت خادم لري، آقسقاللروضيالي لر اشتراكي بيلن بيراحتفال اوتكه زيلگن.

يولگه قوييلگن احتفالده سوزگه چيققن بيرنيچه كيشي تاماندن رحمتلي شاعره نينگ ايجادياتي قيلگن ايش ومدني فعاليت لري باره سيده سوزيوريتيب اوتيلدي.

عين حالده قتنشگن عياللردن بيرقنچه لري تاماندن شونده ي محفللراوتكه زيليشي باشقه عياللرني هم مدنيت ساحه سي بوجمله دن شعروادب عالمي گه يوزكيلتيريب و ترغيب ايتيش اوچون مهم وثمره لي ديب تاكيدلندي.

شوكبي رحمتلي ياش شاعره كيوان نينگ اوزيدن قالديريب كيتگن شعري اثرلريدن بيرنيچه نمونه سي هم اوشبواحتفالده گي لرتاماندن ديكلمه ايتيلدي. منه بو شعرهم اونينگ شعرلريدن نمونه :

برچه انسان بیر ایناغه

ای ایناغم کیل بـوگون کیم برچه سیز گه انتظار

قول بیره میز بیر یوره میز تا که بولسک کامگار

ایتمه افـــغان وهزاره اوتمـــــــه تبعیض یولیدن

کونگلیمیز بیر، یورتـــمیز بیر دوستلیک هم بر قرار

خدمت ایلاب جان کویانیب برچه ده بیر دیک بولیب

بیرلشیب بیرلیکنی ایســــــــــترمیز جهانده پایدار

آدم - آدمغه قریـــــــــنداش دور زمانلر دور گواه

برچه انسان بیر ایناغه شعر ایلــــــه بیر گیل شعار

کوک ارا دایــــــــم کوره میز کیچه لر کیوان میز

سچره تر یارقین نوریــــــنی بیزگه بولگی آشکار

کیوان 1360 ييلي حمل آيي

اوشبواحتفال جريانيده اوستاذ بوتون حيدري نينگ رحمتلي شاعره كيوان اوچون يازيب اوقيگن مرثيه قالبيده گي شعري ايسه قوييده گي شعردن عبارت بولگن.

کیوان رثاسیده

ای قدرلی دوستلربول کون یوراگیم شاد ایم

معرفت قدری نی بیلگن قیغودن آزاد ایمس

اوشبوچرخ سفله پرورسفله نینگ اعزازایتر

اهل دانش نینگ همیشه قیغوگه همراز ایتر

نامراداوتدی جهاندن شاعره کیوانیمیز

بیربیلیمدان وادیب وفاضله انسانیمیز

دایما ظلم وتعصب بیرله پیکارایله دی

یاولره چوری بولیشنی اوزیگه عارایله دی

بو اولوس دردی نی یازدی بیربویوک احساس بیلن

شعرایله غمنامه توزدی بیر طبع حساس بیلن

ضد تبعیض وتعصب چین کوره شدی جان بیلن

دانه- دانه شعر یازدی جوهرایمان بیلن

نظم بیرله بو اولوس دردیگه بولدی ترجمان

شول سبب دن اورتانیب دنیادن اوتی بغری قان

ملت ومیهن اوچون دایم پریشان ییغله دی

دردیگه درمان تاپالمی یوره گی قان ییغله دی

قدرلی کبرای کیوان استاد نامور

فرقتی دن اهل دانش کونگلیده توشدی شرر

ظلم قیلدی باشیگه ای دوست لرجبر زمان

اهل فرهنگ ایچره قالدی ایزگوآتی جاویدان

آنه گوهرشاد بیگیم نینگ فراستلی قیزی

شعریت بابیده ایردی فاریاب نینگ یولدوزی

بول وطن غه حسرتا بی قدربولگن دورقلم

شول سبب دن کونگلیم ایچره دایما دردوالم

شاعرشیوابیان جنت گه ماوا ایله سین

باغ رضوان آره سیدن اوزیگه جا ایله سین

تینگری تعالی درگهی گه مین بوتون قیلدیم دعا

سوگیده مرثیه یازدیم چین یوره کدن بی ریا

مملكت ده بيرنيچه عصربوليب اوتگن اوروش ويوريش لرنتيجه سيده بارمعنوي بايليك لرتالان - تاراج وبيرقطاري هم نابود ايتيلگن شو سبب ينگي نسل ايسه اوزاوتميشي ني بيليب آليشي اوچون شونده ي مدني احتفاللراهميتلي ديب بهالنه دي.شونگه قوشيمچه ينگي نسل اوچون تانيلمه گن بيليمدان وبويوك كيشي لرنينگ آتلريده عام المنفعه جاي لرقوييليشي هم ثمره لي ديب اورغولنماقده.

مرحومه حياتدن اوتگن ليگيده وايه گه ييتمي آنه مهري دن محروم ايتيلگن فرزندلريدن بيري بولگن انجنيرجاويد كيوان ايسه رحمتلي آنه سيني خاطرلش اوچون اوتكه زيلگن بو احتفال تشبث كارلريدن اوزي وعايله سي نينگ منت دارچيليگي ني بيلديريب ،هربيركيشي اوزخلقي اوچون خذمت قيلگن حالده اونوتيلمس ايكن ليگي ني هم تأكيدله دي.

اوغانستانده انقلاب دوریده شكللنگن بيرقنچه توزوم لرتاماندن مطبوعات ساحه سيدن محروم بوليب كيلگن ايلت لرگه اوشبوساحه ده بيرآزايركين ليكلر بيريلدي. بو بيلن اته يين اوزون ييللراقتتدارده بوليب اوتگن بيرقنچه حكومت لرسياستي اساسيده كوزدن دييرلي چيتده قالگن اوزبيك تيليده برنامه لرترقه له باشلب، هم خلق دردي وهم تنقيدي موضوعلر ياروتيليشي گه كينگ كولمده بولمسه هم يول آچيلدي.

اوشه دورده منه شويره تيلگن قولي شرايط ايسه رحمتلی شاعره کبرا کیوان گه اوخشه گن بیرقطاراوزبیک ملیتی گه منسوب عیاللرنینگ هم ایرکک لردیک مطبوعات ساحه سيده وهم شعروادب ساحه سيده قلم تیبره تيشگه اونده گن.

اونينگ بوساحه ده كوتارگن جسارت وآديمي بيلن بيرقطارعايله لرده ايسكي دن سقله نيب كيلگن ايريم عرف وعادتلربارليگي سبب اوزخاتين وقيزلريگه مطبوعات ساحه سيده ايش قيليش رخصتي بيرمسليك مساله سي هم بيرآزحل ايتيليشي گه زمينه بولگن.

رحمتلي كيوان يره تگن شعرلري دري واوزبيك تيليده بوليب بيراق كوپراق شعرلري ايسه اوز آنه تيلي بولميش اوزبيك تيليده يره تيلگن. اونينگ شعرلري تورلي قالب لرده بوجمله دن (غزل،تورتليك، قصيده، قطعه ) وشونگه اوخشش باشقه بيرقطارشعري ژانرلردن عبارت بولگن.

اونينگ شعرلري مضمون جهت دن اوشه دورگي موجود توزوم دن تاثيرلنگن بولسه هم عموما خلق درد- المي وكورگن جفا وستم لري عكس ايتگن. شونينگ ديك ايجاد ايتگن شعرلريدن بيرقسمي عيال قتلمي وضعيتي ني هم تصويرلب بيرگن.

كبرا كيوان ايجادايتگن شعرلريدن بيرقنچه سي فارياب جريده سي همده اوشبوولايت دن تشقري بعضي نشريه لرده ترقاق شكليده چاپ ايتيلگن.شعراوستاذلريگه كوره مرحومه كبرا كيوان نينگ شعرلري بديعي ليك جهت دن ييترلي درجه ده پخته بولمسه هم اوزون ييللر اوزبيك تيلي وادبياتي كوزدن چيتده قالگن ليگي اوچون اوشه شرايطده بوساحه ده جسارت بيلن اورينيش آلقيش گه سزاواربولگن. اوزبيك تيلي وادبياتي گه قلم تيبره تيش چاغي كيلگن بيردوردن كوپ وقت هم اوتمسدي انه شوچاغده مرحومه كيوان ايسه جسارت بيلن شعريت عالميگه يوزكيلتيرگن عياللردن بوليب اوزبيك تيليده نظم يازه ديگن برماق بيلن سنه له ديگن عياللرسيره سيگه كيره دي ديسه بوله دي.

رحمتلي كيوان نه فقط شاعر بوليب قالگن بلكه بيرقنچه وقت ميمنه شهريده اورته مكتب اوقيتووچيسي وكيين فارياب عالي اوقوو انيستيوتي اوستاذي همده اوشبوولايت ده اوشه دورده عيال قتلميدن بيرينچي ژورناليست بوليب دولت چوكاتيده بولگن حاضرگي فارياب ملي راديو وتلويزيونيده ايشله گن.

عين دمده اوانقلاب دوريده گي ايريم ملي تينگ ليك كه ايريشيش غايه سيني ايلگري سوره ديگن سياسي پرتيه (جريان) لردن بيري بيلن يقين فكري علاقه ده بوليب وفعال اعضا لريدن بيري بولگني هم ايتيله دي.

برچه آرزو ومقصدلريگه ييتيشه آلمه گن مرحومه شاعره كبرا كيوان ايسه اوزاثرلريني توپلم قيليب چيقاريشگه تقديريگه ازلدن يازيلگن قيسقه عمر ي مجال بيرمه ي قوياش 1374ييلي ،36ياشيده عالمدن اوتگن.

كيينچه ليك اونينگ توپلم شكلده چاپ ايتيلمي قالگن اثرلري ايسه فرزندلري تاماندن آلتين تاج شعري توپلم كتابي آتيده چاپ ايتيليب ترقه تيلدي.

رحمتلي ياش شاعره كبرا عايله سي تاماندن اونينگ اثرلريدن قالگن قسمي هم يقين كيله جكده ايكينچي شعري توپلم صفتيده چاپدن چيقار يش قراري آلينگن.