بگرام قماقخانه سی مسوولیتنی آلیش، طالبان بیلن مذاکره آلیب باریشگه باغلیق

Image copyright AP

افغانستان قماقخانه لری نینگ مسوولی بی بی سی بیلن بولگن صحبتیده، بگرام قماقخانه سی همده اوشبو قماقخانه ده گی محبوس لر مسوولیتینی آلیشی گه تیارایکن لیگینی ایتدی.

قماقخانه لر عمومی مسوولی ژنرال محمد جمشید، قریب ایککی مینگ کیشی بگرام قماقخانه سیده موجود لیگینی اورغولب، حاضرگه قره گنده اوشبو قماقخانه امریکا قوشمه ایالت لری نینگ حربیلر تمانیدن اداره بولیب کیلینه یاتگنینی ایتدی.

ریاست جمهورلیک سرای بیر بیانات ترقه تیب بیر آی جریانیده بگرام قماقخانه سی نینگ مسوولیتی بوتونلی افغان لرگه تاپشریلیشی ممکن لیگیدن خبر بیرگن ایدی.

بوندن آلدین اعلان ایتیلگن ریجه گه کوره بگرام قماقخانه سی نینگ مسوولیتی 2012 میلادی ییل آخری گه چه افغان کوچلریگه تاپشریلیشی معلوم قیلینگن ایدی. ایندی لیکده جمشید جنابلری نینگ ایتیشیچه بگرام ده گی محبوس لرنینگ افغانستان دولتی گه تاپشیریش جریانی، طالبان بیلن مذاکره لر یولگه قوییلیشی بیلن رابطه سی بولگنی ممکن.

اوتگن ییل افغانستان دولتی نینگ آلگن تصمیمی آرتیدن طالبان گروهی نینگ بیر قنچه محبوس لری خارجی لر قماق خانه سیدن دولت قماقخانه لریگه کیلتیرلیب، بیر قنچه سی ایسه آزاد بولگن ایدیلر.

امیر محمد جمشید نینگ معلوم قیلیشیچه، طالبان گروهی نینگ قریب اوچ یوز کیشی سی بگرام قماقخانه سیدن شو نینگ دیک ایکی مینگ و 500 نفری هم افغانستان قماقخانه لریدن آزاد ایتیلگن لر.

اوتمیش لرده دولت نینگ مذکور حرکتی اولوسی جرگه ده گی ملت وکیل همده دولت سیاستی گه قرشی فعالیت قیله یاتگن حزب لرنینگ قتیغ تنقید لری بیلن یوزمه یوز بولگن ایدی. ایندی هم دولت، بگرام قماق خانه سی نینگ مسوولیتی نی آلیشی بیلن بیر قنچه طالبان اعضا سینی آزاد ایتیش احتمالی بارلیگی ایتیله دی.

سونگی کون لرده طالبان گروهی امریکالیک لر بیلن مذاکره قیلیشگه تیار ایکن لیک لرینی اعلام قیلگن لر. خود شو مسئله اوچون قطر اولکه سیده بیر سیاسی دفتر هم آچیلگن.

طالبان گروهی امریکالیک لر بیلن مذاکره قیلیش نی باشله نیشی دن آلدین، مذکور گروه نینگ بیر قنچه اعضا سی گوانتانامو همده افغانستان ده گی قماق خانه لریدن آزاد ایتیلیشی نی شرط قویگن.

عین حالده امریکا تشقی ایشلر وزیرلیگی نینگ سوزچی لریدن بیری، گوانتانامو ده گی افغان محبوس لرنینگ افغانستان دولتی گه تاپشیریلیشی، هر ایکله تمان اره سیده گی توزه لگن ریجه اساسیده عملی بولیشی ممکن لیگی نی ایتگن.

اوتگن کون افغانستان دولتی بگرام ده گی محبوس لر بیلن یمان یانداشیلگنی دن خبر چیقرگن ایدی. اما امریکا تشقی ایشلر وزیرلیگی مذکور ادعا نینگ تیکشیریلیشی دن خبر بیرگن.