اولوسی جرگه نینگ ایککینچی اورین باسری نعمت الله غفاری بولدی

افغانستان اولوسی جرگه سی، بوگون هلمند ولایتی ملت وکیلی، نعمت الله غفاری نینگ ایککینچی اورین باسر صفتیده علنی شکلیده سیله دی. بوندن آلدین مذکور جرگه ایککینچی معاونی نینگ سیله ش اوچون تورت مرته سیلاو یولگه قوییلدی لیکن مذکور سیلاولر هیچ بیر نتیجه گه ایریشگن یوق ایدی. اولوسی جرگه ده سیاسی قره مه قرشی لیک لر موجود لیگی باعث تونان گه قدر ایککینچی اورین باسر سیلنمه گن ایدی. اما بوگون ملت وکیل لر، علنی شکلده هلمند ملت وکیلی نعمت الله غفاری نینگ ایککینچی اورین باسر صفتیده سیله دیلر. بوگون مجلسده 125 کیشی حاضر بولیب، غفاری جنابلریگه 121 نفری مثبت آواز بیرگن. توناونکی مجلس ده غزنی ملت وکیلی شاه جهان نوری، لوگر ملت وکیلی شکیلا هاشمی، هلمند ملت وکیلی نعمت الله غفاری و کوچی لرنماینده لریدن محمد نذیر احمد زی، اولوسی جرگه نینگ ایککینچی اورین باسرلیگی نینگ قولگه کیلتیریش مقصدی بیلن نامزد بولیب، هیچ بیری هم 50 جمع بیر رأی نی قولگه کیلتیره آلمه گن ایدیلر. اولوسی جرگه نینگ 16 نچی دوری ایگیرمه کون آلدین رسمی شکلده ایشگه باشله ب، حاجی عبدالقدیر ظاهر نینگ بیرینچی اورین باسر صفتیده، عبدالستار خواصی نینگ منشی صفتیده همده فرهاد عظیمی نینگ ایککینچی منشی صفتیده سیله دی. لیکن اوشه پیت دن حاضر تا بوگون گه قدر مذکور جرگه نیچه مرته سیلاو یولگه قوییشی بیلن، ایککینچی معاونی نینگ سیله ش گه قادر بوله آلمه گن ایدی. اما غفاری جنابلری نینگ سیلنیشی، اولوسی جرگه ده گی بیر قنچه ملت وکیل لرتمانیدن علنی سیلاولر یولگه قوییلیش طلبی بیلن بوگون فوق العاده بیر جلسه آرقه لی عمل گه آشیریلدی.