قرآن شریف گه اهانت قیلگن امریکالیک لرگه قرشی ناراضلیک لر، زوراوانلیککه ایلندی

Image copyright BBC World Service

خلق ارا کوچلر قرشی سیده یولگه قوویلگن بوگون کی ناراض لیک نمایش لرده اینگ آز آلتی کیشی هلاک بولگن و اوتیز دن آرتیق هم یره لنگن. مذکور ناراض لیک نمایش لر بگرام ده قرآن شریف گه حرمت سیز لیک بولگن ادعا سی بیلن عملگه آشیریلگن. پروان، کابل و ننگرهار نینگ جلال آباد و شینوار حدودلریده گی ناراض لیک نمایش لر زوراوانلیککه ایله نیب، اما لوگر و کنر ده گی نمایش لر خشونت سیز توگه گن. قرآن شریف گه امریکا لیک لر تمانیدن حرمت سیز لیک بولگن ادعا سی بیلن بوگون هم توناون کی دن کوره کیینگ راق شکلیده مملکت نینگ ایریم حدود لریده ناراض لیک نمایش لر یولگه قوییلدی. بو ناراضلیک نمایش لر کابل شهری، ننگرهار، کنر، پروان و لوگر ولایت لریده مردم تمانیدن عملگه آشیریلدی. کابل ده گی ناراض لیک نمایش ده نمایشچی لر، امریکالیک لرنینگ فونکس ناملی قرار گاهیگه کیرماقچی بولیب لیکن پولیس ممانعتی بیلن یوزمه یوز بولدی لر. ناراض کیشی لر، موتر تایر لری نینگ کویدیریش لری بیلن، کابل جلال آباد شاه یولینی باغلب، امریکا لیک لرگه قرشی شعار بیرریدیلر. کابلده گی ناراض کیشی لردن بیری بونده ی دیدی: " بو امریکالیک لر کیلگن بو ییرده تا بیزگه دولتی میزنی توزه تسه، اما بولر بیزنینگ دینی میز و ناموسی میزگه خیانت قیله دیلر. قانیمیز نینگ آخیرگی قطره سی توشگن چه بولرنی بونده ی قویمه یمیز، اولگنیمیزگچه بولر بیلن اوریشه میز" کابلده گی ناراضلیک نمایش لر زوراوانلیککه ایلنگنی دن کیین، نمایش چیلر بیرلشگن ملت لر تشکیلاتی همده خارجی لر نینگ ایککی موتر لری گه تاش آتیب هجوم قیلدیلر. باشقه تماندن، جلال آباد ده گی ناراضلیک نمایش نی اوییشتیرگن لر هم قرآن شریف گه اهانت قیلگن لر محکمه گه تارتیلیشی نی طلب قیلریدیلر. شو نینگ دیک کابل وننگرهار ده گی ناراض لیک نمایشلری ده ، اوق آتیلیش سیسی هم ایشیتیلیب، نمایش چیلر و پولیس آره سیده توقنه شو یوز بیرگن. افغانستان جمهور رییسی حامد کرزی، امریکا لیک لرنینگ بگرام ده گی حربی قرار گاهی گه حادثه قنده ی یوز بیرگنینی تاپیشی خصوصیده بیر گروه هیئت نی تشکیل بیرگن. عین زمانده بوگون، افغانستان پارلمانی هم بوگونکی مجلسی ده، قرآن گه حرمت سیزلیک بولگن اعتراضی بیلن، مذکور حادثه نینگ تیکشیریش اوچون بیر هیئت تنله گن. اما بوندن بیر کون مقدم، امریکا قوشمه ایالت لری نینگ یوقاری مقام لری، همده افغانستانده گی ناتو کوچلری نینگ باش قوماندانی، جنرال جان آلن، بو حادثه عمدی ایمس ایکن لیگی نی ایتیب، افغانستان جمهور رییسی اینیقسه مردم دن عذر سوره گن ایدیلر. افغان لر، دینی مسئله لر توغری سیده انچه حساس بولگن لری اوچون، دین حقیده خارجی لر تمانیدن، هرقنده ی حرمت سیزلیک بولگنی قرشی سیده ناراضلیک کورسه تگن لر. اوتگن ییلی، بیرلشگن ملت لر تشکیلاتی نینگ مزارشریف ده گی اون ایشلاوچی سی، ناراض کیشی لر تمانیدن هلاک ایتیلگن ایدی شو نینگ دیک مذکور حادثه ده اونلب کیشی هم یره دار بولگن ایدی. بو مظاهره لر، امریکالیک بیر کشیش تمانیدن قرآن شریف نی کویدیریش قراری آلینگنی آرتیدن عملگه آشیریلگن ایدی. شونده ی بیر حالده، طالبان گروهی هم خارجی کوچلر قرشی سیده دینی مسئله لر گه حرمت سیزلیک بولگن گزارش لرنی ترقه تیش لری بیلن، مردم دن سیاسی فایده لنیش لری ایتیله دی.