جلال آباد هوا قونالغه سیده قانلی هجوم یولگه قوییلدی

Image copyright AFP

جلال آباد دن کیلگن سونگی خبرلرگه کوره، مذکور شهر هوا قونالغه سیده بیر هجوم یوز بیریشی نتیجه سیده اینگ آز توقیز کیشی اولگن و اون کیشی هم یره لنگن.

مذکور حادثه ده قربان بولگن لر، کسل خانه ده انتقال بیریلگن.

شو نینگ دیک، امریکالیک کوچلرنینگ مطبوعات بولیمی نی بیلدیریشیچه، مذکور حادثه ده، تورت عادی اهالی، ملی اردو نینگ بیر عسکری، و ایککی خوف سیزلیک مأموری هلاک ایتیلگن و آیساف کوچلری نینگ اوچ عسکری بیلن قوشیمچه، اون کیشی یره لنگن.

اول راق پولیس مذکور حادثه ده اوچ کیشی اولگنی و نیچه کیشی هم یره لنگنی نی ایتگن ایدی.

بیر عصیانچی بیر موتر دن فایده لب، اوزینی جلال آباد نینگ هوا قونالغه سی ایشیگی نینگ یانیده پارتله تگن.

خوف سیزلیک کوچلری گه کوره، حادثه اطرافی ناتو کوچلری تمانیدن باغلنگن. و هیچ کیم اوتیب قیته آلمه یدی.

مذکور حادثه مسوولیتی نینگ طالبان گروهی اوز ضمه سیگه آلیب، مذکور گروه سوز چیسی آتیدن بیر بیانات هم ترقه تیلگن.

مذکور بیانات نینگ معلوم قیلیشیچه، مذکور هجوم بگرام حربی قرار گاهیده قرآن کریم گه حرمت سیزلیک بولگنی مقابلی ده عمل گه آشیریلگن.

اوتگن نیچه کون جریانیده افغانستان نینگ ایریم ولایت لریده، قرآن کریم گه حرمت سیزلیک بولگن اعتراضی بیلن نارض لیک نمایش لر یولگه قوییلدی.

امریکالیک لر ایسه، مذکور کتاب لر اورته دن ایلتیلیشی عمدی ایمس ایکن لیگی نی ایتگن لر.