تورکیه افغانستان بیلن تجاری علاقه لری نینگ کینگه یتیرماقچی

Image copyright Reuters

تورکیه تاجرلری افغانستان بیلن تجارت بولیمده گی علاقه لرنینگ کینگه یتیریشی نی اعلام قیلیب، مذکور رابطه لر خارجی کوچلر افغانستان دن چیقیب کیتیشی بیلن هم دوام تارتیشی نی معلوم قیلگن لر.

خود شو مسئله اوچون کیله سی بیر هفته گه چه، اقتصادی قوشمه بیر کورکزمه افغان و تورک تاجرلری تمانیدن کابلگه یولگه قوییلیشی ریجه لنگن.

ناتو چوکاتی ده گی اولکه لر قطاریده تورکیه مسلمان اولکه صفتیده اوتگن اون ییل دن بیری افغانستان ده هم حربی عسکر یوبارگن و هم قیته قوریش بولیم لرده یاردم بیریب کیلگن.

بو مملکت اوتگن اون ییل جریانیده قریب بیر ملیارد دار تورلی بولیم لرده افغانستانده سرمایه یاتقیزگن.

افغان ترک تجارت اتاقی نینگ باشلیغی مراد آق یوز، اوتگن نیچه ییل دن بیری تورکیه تاجر لری افغانستانده سرمایه یاتقیزیش اوچون علاقه لر کوپه یگنی نی ایتیب، افغانستان و تورکیه آره سیده گی تجاری و اقتصادی علاقه لرنینگ کینگه یتیریش توغری سیده سعی و حرکت لر جریانی بارلیگی نی هم معلوم قیلدی.

"بیزنینگ افغانستانده بولیشی میز بو معنی ده ایمس که گویا بیزنینگ حربی کوچلری میز بو ییرده و بیز شو اوچون اولر نینگ یانیده میز. بیز بو ییرده افغانستان خلقی بیلن دوست لیگی میز و رابطه لریمیزنینگ کینگه یتیریش اوچون کیلگن میز. بو علاقه لر 2014 نچی ییلده خارجی کوچلر چیقیشی دن کیین هم دوام تارتیله دی. تورکیه نینگ تاجرلری و سرمایه یاتقیزوچی لری افغانستانده فعالیت قیلیش نی ایسته یدیلر."

افغانستان و تورکیه اقتصادی مناسبت لری نینگ کوچه یتیریش مقصدیده کیله سی بیر هفته گه چه، افغان و تورک تاجرلری تمانیدن اقتصادی بیر کورکزمه کابلده یولگه قوییلیشی هم ریجه لنگن.

مذکور کورکزمه ده هر ایککله مملکت اونلب تاجرلری، محصول لری نینگ نمایش گه قویه دیلر.

افغانستان و تورکیه آره سیده گی سودا آلیش بیریش هزینه سی هر ییلی اوچ یوز ملیون دالر دن کوپراق بوله دی. بو مبلغ دن 275 ملیون دالری تورکیه، افغانستانگه یوباره یاتگن مالی تشکیل بیریسه قالگنی ایسه افغانستان دن تورکیه گه کیته یاتگن مال لر تشکیل بیره دی.

حاضر افغانستان ده قریب 250 تورکی شرکت تورلی بولیم لرده فعالیت قیلیب کیلماقده.

عین زمانده تورکیه افغانستان نینگ جوزجان، کابل و میدان وردک ولایت لریده قریب 1800 یوز عسکری بار.

مذکور مملکت قیته قوریش بولیم لردن تشقری افغانستان حربی کوچلری نینگ تعلیم بیریشی توغری سیده هم یاردم بیریب کیلماقده.