برهان الدین ربانی نینگ اوغلی، تینچلیک کینگاشی رییسی بولدی

Image copyright .

افغانستان عالی تینچلیک کینگاشی، برهان الدین ربانی اوغلی صلاح الدین ربانی نینگ مذکور کینگاش رییسی صفتیده سیله دی.

جمهور لیک ریاستی سرایی، ربانی جنابلری نینگ مذکور مسوولیت ده سیله گن لیگی نی بوگون اعلام قیلدی.

عالی تینچلیک کینگاشی نینگ قدیم کی رییسی برهان الدین ربانی 1390 نچی قویاش ییلی سنبله آییده بیر خود کش لیک هجوم نتیجه سیده هلاک بولگنی آرتیدن حاضر گه قدر مذکور کینگاش نینگ رییسی یوق ایدی.

ربانی جنابلری ترور ایتیلگنی دن کیین، اونینگ کتته اوغلی جمعیت اسلامی حزبی نینگ وقتیچه لیک رییسی صفتیده سیله نیب، ایندی ایسه، تینچلیک کینگاشی ده هم آته سی نینگ جاییگه سیله نگن.

صلاح الدین ربانی آته سی ترور بولمس دن آلدین افغانستان نینگ تورکیه ده گی ایلچی سی ایدی.

تینچلیک کینگاشی طالبان و باشقه عصیانچی گروه لر بیلن مذاکره لرنینگ ایلگری آلیب باروچی مهم نهاد لردن حسابلنه دی.

اما بیر قنچه تحلیل چیلر مذکور کینگاش کوزگه کورینرلی درجه ده اختیارگه ایگه ایمس لیگی نی ایتیب، فقط گینه نمادی بیر نهاد صفتیده ایشله یشی نی ایته دیلر.

جمهور لیک ریاستی سرایی تمانیدن ترقه تیلگن بیانات گه کوره، صلاح الدین ربانی نینگ تینچ لیک کینگاشی ده رییس صفتیده سیله نیشی، مملکت ده بیرلیک نینگ تامین قیلیش همده خارجی اره لشیشی نینگ آلدی نی آلیش مقصدیده سیله نگن دیب ایتگن.

صلاح الدین ربانی شونده ی بیرحالده افغانستان تینچ لیک کینگاشی نینگ رییسی صفتیده سیله نگن که، گلبدین باشچیلیغیده گی اسلامی حزب هیئتی کیله سی هفته دن افغانستان دولتی بیلن ینگی دن مذاکره لرنی باشله یشی اوچون کابلده کیلیشی بیلگی لنگن.

اسلامی حزبی بیلن مذاکره لر قنده ی یولگه قوییلیشی اوچون، عالی تینچلیک کینگاشی نینگ اعضالری تمانیدن یولگه قوییلگن یغین ده، جمهور رییس کرزی و صبغت الله مجددی هم قتنشه گن لیگی ترقه تیلگن.

بوندن آلدین، صبغت الله مجددی، کرزی تمانیدن عالی تینچ لیک کینگاشی نینگ رییسی صفتیده سیله نمه گنی اوچون برچه مسوولیت لریدن استعفا گه چیقگن ایدی.

مجددی جنابلری تحکیم صلح کمیسیونی رییسی و سنا مجلسی نینگ اعضا ایدی. بیرقنچه گزارش لرگه کوره، او افغانستان عالی تینچلیک کینگاشی نینگ ریاستی نی قولگه کیلتیریشی نی هم ایسته گن ایکن.