اوزبیک نثرچیلیگیگه بیر نظر

در واقع هر قنده ی علمی- ادبی ایجاد و فعالیتلر تیل نینگ یوکسلیب،‌ رواجلنیشیگه باعث بوله دی. خوب شونده ی ایکن افغانستان اوزبیکلری آره سیده نثرچیلیک وضعیتی قی احوالده؟ بلخ عالی گاهی اوزبیک تیلی و ادبیاتی بولیمی نینگ ایککینچی صنف طلبه سی شگوفه بوحقده اوز فکرینی بیلدیررکن، نثرلرنینگ آزلیگی حتی کی اوزبیکچه سوزلریمیز ذخیره سی نینگ تاره ییشیگه سبب بوله دیب ایتماقده. اونگه کوره "نثر ساحه سیده قیینچیلیکلریمیز کوپ. مثلن اگر بیز سیمینار تیارلماقچی بولسک؛ کوپینچه دری تیلیدن ترجمه قیلیب یاکی لاتین و کیریل الفبالریدن اوزگرتیریب، کیین ‌فایده لنه میز."

افغانستان اوزبیکلری نینگ تیلینی رواجلنتیریش و اونی اورگنیش یولیده تورگن ثمره لی راق یوللرنینگ بیری ایسه، کوپگینه طلبه لرگه کوره نثری ایجادیات دیر. ایریم اوقووچیلرگه قره گنده؛ اوتمیش دور نینگ محصولی بولگن نادر نثری اثرلر نینگ قولیازمه نسخه لری افغانستانده یوقلیگی یاکی کم درجه ده موجودلیگی اوزبیک تیلیده نثر کتابلری نینگ اونچه لیک یوقلیگی و نثر دایره سینی کیچیکراق بولیشیگه حصه قوشه دی.

Image copyright bb

بلخ بیلیم یورتی نینگ اوزبیک تیلی و ادبیاتی بولیمیده استاد صفتیده فعالیت آلیب باره یاتگن محمد یعقوب قره ش جنابلری ایسه، نثرچیلیک میدانی ایندی کینگه ییب باریشینی بیللی قیلیب، بو بابده شونده ی فکر بیلدیره دی.

« حاضرگی کونده نثری اثرلر خواه ظنز بولسین،‌ خواه حکایه توپلملری باسیمدن چیقه باشله گن. مثال اوچون: شفیقه یارقین نینگ "ینه کوریشگونچه" دیب ناملنگن حکایه لر توپلمی یاکی، "سوکیش هم پول بولر ایکن!" محمد حلیم یارقین دن ظنزلر توپلمی، قاله ویرسه، نورالله آلتای نینگ "همه گپ پولده" حکایه لر توپلمی کبی نثری توپلملر باسیمدن چیقیب،‌ اوقوچیلر اختیاریگه قوییلگن. منه شو اوزی اوزبیک نثرچیلیگی نینگ رواجلنیب باریشیگه دلالت بیره دی"

افغانستان اوزبیکلری آره سیده نثر ساحه سیده اوزیل- کیسیل ییترلی ایشلر قیلینمه گن دیگن فکرلرنی ایریملر رد قیلسه، کوپچیلیک ایسه عکسینچه فکر و قرارده. طلبه لرگه کوره قنده ی بولمه سین بری بیر نثرنینگ یوکسلیب کیتیشی و کینگراق قولاچ یاییشی اوچون کتته راق قدملر کوتریلیشی کیره ک.