طالبان گروهی 16 پولیس نینگ بدخشان دن آلیب قاچگن

Image copyright BBC World Service

بدخشان ولایتی دن ییتیب کیلگن معلومات لر اساسیده، توناون کیچه طالبان گروهی بدخشان نینگ وردوچ اولوسوالیگیده هجوم اوییشتریب، نتیجه ده، اوچ چیگره پولیس مأموری نی هلاک قیلیب، ینه 16 پولیس نینگ الیب قاچگن لر.

محلی رسمیلرگه کوره، طالبان گروهی پولیس گه قرشی هجوم قیلگن پیتی، پولیس کوچلری هم اوز لریدن مقاومت کورسه تگن لر اما بو مقاومت کوپ دوام قیلمه ی طالبان قولی گه توشگن لر.

معلومات لرگه کوره، هجوم اوییشتیرگن طالبان گروهی اول، محلی رسمیلرگه تینچ لیک جریانیده قوشیلیش لرینی ایتگن ایکن لر اما فیض آباد دن آق سقال لر اولر اوچون وردوچ اولوسوالیگیگه کیتگن پیتی ده مذکور طالبان اعضالری هجوم اوییشتیرگن لر.

حاضر گه قدر آلیب قاچیلگن پولیس خادم لری قه ییرده بولگنی توغری سیده هیچ قنده ی معلومات ترقه تیلمه گن. اما محلی رسمیلر، مذکور پولیس لرنینگ قوتقریش اوچون ینگی بیر عملیات نی ریجه لشتیرماقده بولگن لرینی معلوم قیلماقده لر

محلی رسمیلر طالبان گروهی نینگ نیچه نفری هم مذکور هجوم ده هلاک بولگنی نی معلوم قیلگن.

شو نینگ دیک، طالبان گروهی هچوم اوییشتیرگن خوف سیزلیک پوسته ده، عموماً 43 پولیس خادمی موجود ایکن. بوجلمه دن اوچ کیشی هلاک بولگن، ایککی کیشی یره لنگن و 16 کیشی هم طالبان قولیگه توشگن، قالگن پولیس خادم لری ایسه قاچیش گه موفق بولگن لر.

طالبان گروهی حاضر گه چه مذکور پولیس خادم لر بیلن قنده ی بیر مناسبت کورستیش لری توغری سیده هیچ نرسه ایتمه گن لر.

شونده ی بیرحالده طالبان سوزچی لریدن ذبیح الله مجاهد، قولگه کیریتگن پولیس لرنینگ اوچ موتری نی هم آلیب قاچگن لرینی معلوم قیلگن.

اما بدخشان نینگ محلی رسمیلری، مذکور حادثه ده وردوچ اولوسوالیگی نینگ بیر قنچه اهالی سی طالبان اعضا سی بولگن لری اوچون، پولیس گه قرشی یولگه قوییلگن هجوم ده طالبان بیلن یاردم بیرگنی نی معلوم قیلگن.

شو نینگ دیک نیچه آی ایلگری وردوچ اولوسوالیگیده افغان و ناتو کوچلری قوشمه بیر عملیات یولگه قوییب، مذکور گروه نینگ 15 نفرینی هلاک قیلگن ایدیلر.

اوتگن نیچه ییل دن بیری طالبان گروهی حکومت همده خارجی کوچلر قرشی سیده کوره شیش اوچون تورلی تکتیک لردن فایده لنیب، عصیانچی لیک فعالیت لرنی مملکت بویلب بجرماقده لر.

بوندن آلدین راق، عالی تینچ لیک کینگاشی رییسی برهان الدین ربانی هم خود شو کبی بیر موضوع اوچون هلاک بولدی. یعنی انتحارچی شخص طالبان آدرسی دن مذاکره اوچون کابل گه کیلیب، اوزینی پارتله تدی.

حکومت هر دایم طالبان گروهی نینگ مذاکره قیلیش گه چقیرگن حتی که سونگی کون لرده قدرت نینگ طالبان بیلن بولیشی نی هم معلوم قیلگن. اما طالبان گروهی حکومت نینگ مذکور التماس لریگه قرشی توریب، تورلی عصیانچیلیک هجوم لرگه قول اورگن لر.