"محلی پلیس کوچلری نینگ زوروانلیک لرگه قولی بار"

افغانستان مستقل انسان حقلرینی سقلش کمیسیونی بیر حسابات ترقه تیب، محلی پلیس کوچلری نینگ فعالیت لریدن خواطر اظهارایتگن.

انسان حقلرینی سقلش کمیسیونی تمانیدن نشر ایتیلگن حساباتده محلی پلیس کوچلری نینگ فعالیت لری ایریم منطقه لرده امنیت نینگ تامین لش اوچون فایده لی ایکن لیگی ایتیلگن بولسه ده لیکن اکثری منطقه لرده اولر خوف سیزلیکنی بوزیش وتورلی خیل زورانلیک لرگه عامل بولیب کیله یاتگنی گه عیبلنگن.

شونینگ دیک حساباتده، طالبان نینگ سابق اعضالری همده غیر مسوول قوراللی گروه لر گه علاقه دار بولگن شخص لر محلی پلیس کوچلری چوکاتیده کیریتیلگنیدن خواطر بیلدیریلگن.

شونگه قوشیمچه افغانستان بویلب فعالیت آلیب باره یاتگن محلی پلیس کوچلری نینگ توقسن ویا توقسن بیش فایزی سواد سیز بولگنی هم حساباتده قید ایتیلگن.

افغانستان مستقل انسان حقلرینی سقلش کمیسیون نینگ باشلیغی خانم سیما ثمر، کابلده اوتکزگن مطبوعات انجمنیده، محلی پلیس کوچلری نینگ ایریم فعالیت لریدن جدی خواطر بیلدریب بوحقده شوندی فکر بیلدیردی:"کمیسیون نینگ خواطرلریدن بیری شو کی بو کوچلر دولت نینگ نظارتی بولمه گن منطقه لرده ایجاد ایتیله دی. اولرنی فعالیت لری جدی بیرشکلده دولت تمانیدن نظارت بولمیدی، تشویشی میز شوکی نظارت کوچلی ایمس همده قسقه مدتلی تربیه لش دستورلریدن اوتگن، شو اوچون اولر انسان حقلرینی ایاق استی ایتیب مردم نینگ ازاراذیت قیله دیلر. بوکبی معمالر مردم نینگ دولت دن اوزاق لشتیره دی دیدی خانم سیما ثمر."

عینی حالده خانم ثمر، محلی پلیس کوچلری نی مشق و تیارگرلیک لردن اوتکزیش اوچون جدی اعتبار قره تیلیشینی تاکیدلب، 2014میلادی ییلدن کیین اوشبو کوچلر افغانستان ملی پلیس کوچلری صفی گه کیرتیلیشینی طلب قیلگن.

مستقل انسان حقلرینی سقلش کمیسیونی ، یتمیش کیشی خوف سیزلیک مسوللری ، قوم باشلیغی لری ولایتی کینگاش وایریم خلق ارا کوچلر قوماندانلری بیلن صحبت له شیب آنه شو حساباتنی تیارله گن.

افغانستان ایچکی ایشلر وزیرلیگی، مطبوعات انجمنیده انسان حقلرینی سقلش کمیسیونی تمانیدن نشر ایتیلگن حساباتنی رد ایتدی. اوشبو وزیرلیک سوزچیسی صدیق صدیقی محلی پلیس کوچلر فعالیت لرینی فایده لی اتب شو اوچون اوشبو کوچلر سانینی 2014میلادی ییلگه چه 30 مینگه قدر کوپتیریلیشدن خبربیردی.

محلی پلس کوچلری نینگ تخارده کی قوماندانلریدن بیری ملک احمد تاتار، مستقل انسان حقلرینی سقلش کمیسیون نینگ بو حساباتینی اساسی یوق لیگینی تاکیدله دی.

محلی پلیس کوچلری نینگ ملی پلس دن اساسی فرقی شو کی اوشبو کوچلر فقط اوز منطقه لریده خوف سیزلیکنی تامین لش اوچون فعالیت آلیب باره دیلر.

حاضرگه قره گنده محلی پلیس کوچلر ی سانی اون بیرمینگه ایتیشگن. هرچند افغانستان حکومتی اولرگه ایلیک بیریلیشدن سوزیوریته دی لیکن محلی پلیس قوماندانلریدن ملک احمد تاتار شوپیتگه قدر دولت تمانیدن بیریلیشی وعده بیریلگن ایلیک لرینی قولگه کیرتمه گنیدن شکایتده.