مصرلیکلر ینگی جمهور رییس سیله شماقده

Image copyright Getty

مصرلیکلر حسنی مبارک قدرتدن کیتکزیلگنیدن 15 آی اوتیب، ینگی رییس جمهور تنلشماقده. مملکت بویلب 50 میلیون مصرلیک سیلش حقوقیگه ایگه و آواز بیریش شهابچه لری آدملر بیلن تولیب باره یاتگنی خبر قیلینه دی.

ینه اوشبو موضوعگه عاید: مصرده "مسلمان برادرلر" جانلی زنجیر حاصل قیلیشماقچی مصر: اسلامنی "حقارت قیلگن" اکتور اوچ آیگه قملدی. مصر: باش قانون تقدیری اسلامچیلر قولیگه اوتدی.

علاقه دار موضوعلر یقین شرق 2011 ییل فبروری دن بیری مصرنی باشقریب کیله یاتگن حربی کینگش خلققه عدالتلی سیلاولر و فقرایی حکومتنی وعده قیلگندی.

ایلک ایرکین سیلاو دیب تعریفلنه یاتگن جریانده اسلامی قره شده گی سیاستچیلر دنیاویلرگه، انقلابچیلر ایسه، مبارک دوریده گی وزیرلرگه قرشی بیلله شیشماقده.

آواز بیریش جریانی محلی وقت بیلن 08:00 ده باشلنگن. قاهره ده گی کوپلب آواز بیریش شهابچه لریگه کیله یاتگنلر سانی هر دقیقه ده آشه یاتگنی خبر قیلینه دی.

بی بی سی گه گپیرگن مصرلیک عیاللردن بیری: "بو- جوده اوزون کون و کتته واقعلیک. مصرلیکلر اوزگریش یششلری اوچون ییریک امکانیت"، دیب ایتگن.

آواز بیریش اوچون نوبتده تورگنلردن بیری قنچه کوتیب قالگنی حقیده سوره لگنده: "30 ییل"، دییه جواب بیرگن.

کوچلی نامزادلر

سیلاوده 13 نامزاد بیلله شماقده. اولردن 4 نفری اینگ کوچلی نامزادلر صفتیده کوریله دی

احمد شفق، او هوا کوچلری سابق قومندانی و 2011 ییل فبروری آییده قیسقه مدت باش وزیرلیک وظیفه سینی بجرگن.

امر موسی، او سابق تشقی ایشلر وزیری و عرب لیگه سی رهبری وظیفه سیده ایشله گن.

محمد مورسی، مسلمان برادرلری آزادلیک و عدالت پرتیه سی رهبری.

عبدالمنیم ابوالفتوح، اسلامی قره شده گی مستقل نامزاد.

قوشمه ایالتلرده تعلیم آلگن مهندس محمد مورسی اولیگه مسلمان برادرلر پرتیه سینینگ ظهیره ده گی نامزاد بولگن. اما، سابق سیاسی محبوس حیرت الشطیرنینگ نامزادی عالی سیلاو کمیسیونی طرفیدن رد ایتیلرکن، جناب مورسی الدینگی قطارگه چیققندی.

ینگی کانیستیتوتسیه تصدیقدن اوتمه گونچه، ینگی جمهور رییس قنده ی وکالتلرگه ایگه بولیشی معلوم ایمس و حربیلیک بیلن کیلیشماوچیلیکلر کیلیب چیقیشی ممکنلیگیدن خواطرلر بار.

بی بی سی نینگ یقین شرق مسله لری بوییچه محرر جیریمی باوین هم افتیدن حربیلیک جمهور رییس کرسی سی آرتیده گی قدرت صفتیده قالیشگه قطعی عهد قیلگن و حربیلیک بیلن توقنه شوو احتمالی کوتیله یاتگنینی ایته دی.

سیلاولر مصرلیکلر اوچون مهم بوریلیش نقطه سی، دییه تعریفلنماقده. اولر مملکت نینگ 5000 ییللیک تاریخیده ایلک بار اوز رهبرلرینی تنلش امکانیتیگه ایگه بولگنلر.

سیلاودن سونگ ترتیب سیزلیکلر باشلنیشی احتمالیدن خواطرده بولگن قوراللی کوچلر عالی کینگش ینگی جمهور ریس کیم بولیشی یوزه سیدن فقط مصرلیکلرنینگ اوزلری قرار بیریشلرینی ایتگن.

اگر ایلک باسقیچده غالب اینقلنمه سه، سیلاونینگ نوبتده گی باسقیچی 16- 17 جون کونلری اوتکزیله دی.