بلخ ولایتیده قوراللی شخصلر توی مراسمیگه باستیریب کیریشگن

Image copyright AFP

افغانستان شمالیده گی بلخ ولایتیده قوراللی شخصلرنینگ بیر توی مراسمیگه حمله قیلیشی بیلن بیرگه ایککی کیشی هلاک بولیب ینه ایککی شخص یره لنگن.

بلخ خوفسیزلیک اداره سی سوزلاوچیسی نینگ ایتیشیچه؛ حمله قیلگن اوشبو کیشیلر دولت مخالفلری جمله سیدن بولگن، بو ایشنی هم فقط خوفسیزلیکنی بوزیش اوچون قیلگنلیکلرینی اورغولگن.

مذکور قوراللی شخصلراوتکن کیچه شمالی بلخ اولوسواللیگی نینگ چهارباغ گلشن قیشلاغیده بولیب اوته یاتگن بیرتوی مراسمیگه باستیریب کیریشگن، حمله نتیجه سیده توی قتنه شووچیلریدن بولگن ایککی مهمان هلاک بولیب ایککیته سی ایسه یره لنگن.

بلخ ولایتی خوفسیزلیک اداره سینینگ سوزلاوچیسی جناب شیرجان درانی نینگ بی بی سیگه ایتیشیچه؛ دولت گه قرشی گروهلر آرتیق پولیس کوچلری بیلن یوزمه- یوز کوره شیش قابلیتیگه ایگه ایمسلیکلری باعث هم، تینچ اهالی و عادی فقرالرنی تورلی یوللر آرقه لی تهدید قیلیشگه اورینماقده لر.

هرچند پولیس خلقنی تینچ یششی اوچون اورینیب کیلماقده بیراق، بو کبی ناقرارلیکلر تورلی ساحه لرده کوزگه تشله نیب هم کیله یاتیر. بیر هفته آلدین هم بلخ نینگ چمتال اولوسواللیگیده یول چیککه سیده اورنه تیلگن بمب پارتلشی عاقبتیده، ایککی آدم هلاک بولگن ایدی.

بلخ ولایتی افغانستان نینگ تینچ حدودلریدن حسابلنسه- ده، اونده گی سونگی ناقرارلیکلر خلق نینگ جدی خواطرلریگه باعث بولیب کیلماقده.

حکومت و اونینگ مخالفلری اورته سیده گی اوروش- جنجاللرنینگ تینچ اهالی گه ضرر بیره یاتگن حاللری ایسه نیچه مرته حقوقی و خلق ارا تشکیلاتلرنینگ قرشی مناسبت بیلدیریشلریگه سبب بولگن