معنوی: افغانستان سیلاولری اوچون ینگی قانون توزه لدی

Image copyright Reuters

افغانستان مستقل سیلاولر کمیسیونی، نیچه ییل اوتیشی بیلن، سیلاولر قانونی نینگ مسوده سی نی توگه تیب، ایرته گه چه، عدلیه وزیرلیگیگه تاپشیره دی.

مذکور کمیسیون رییسیگه کوره، سیلاولر قانونی نینگ محتوا و شکلیده اینگ آز 50 فایز اوزگریش کیلگن.

سیلاولر سیستمی، سیلاولر کمیسیونی نینگ صلاحیت لری، سیلاولر شکایت لری اوچون کمیسیون تشکیل ایتیلیشی و سیلاولر یولگه قوییلیشی اوچون عملی برنامه لر، سیلاولر قانونی نینگ مهم اوزگریش لریدن حسابلنه دی.

سیلاولر کمیسیونیگه کوره، اگرده کیله سی سیلاولر اوچون حاضر دن تیارگرلیک لر آلینمسه، شفاف سیلاولر یولگه قوییلیشی اوچون هیچ قنده ی تضمین یوق.

اوتگن اون ییل جریانیده، مملکت سیلاولری نینگ قانونی یوق لیگی کوپ گینه جنجل لر توغدیرگن. بو مدتده جمهور لیک ریاستی و پارلمان نینگ ایککی ایککی مرته سیلاولری یولگه قوییلیشی یالغوز گینه جمهور رییس نینگ تقنینی فرمانی بناسیده عملگه آشیریلگن.

مذکور مسوده عدلیه وزیرلیگی تمانیدن تیکشیریلیب، تایید اوچون پارلمان گه یوباریلیشی ایتیلماقده.

سیلاولر کمیسیونی نینگ رییسی فضل احمد معنوی گه کوره، سیلاولر قانونی گه اوزگریش کیلیشی، سیاسی حزب لر، سیلاولردن نظارت ایتوچی نهاد لر، مدنی قوریلمه لر و تعلیمی و تحصیلی نهاد لر بیلن چقور مصلحت لر یولگه قوییلیشی بیلن توزه تیلگن.

شونده ی بیرحالده، افغانستان ایرکین و عادلانه سیلاولر بنیادی نینگ رییسی جان داد سپین غر ایسه، مستقل سیلاولر کمیسیونی اولر نینگ پیشنهاد لرینی نظرده توتگن یا توتمس لیگی توغری سیده اولرنی جریانگه قویمه گن لیگی نی ایته دی.

"بیزنینگ پیشنهاد لریمیز انچه انیق ایدی، مثلا بیز ایتگن ایدیک که اولوسی جرگه اوچون نامز قیله یاتگن شخص لر نینگ قنچه سوادی بارلیگی انیق بولسین، شو نینگ دیک نامزد لرصلاحیت لری نینگ رد قیلیش مسئله سی، عین حالده، نامزد لر نینگ سیلاولر جریانیده، مالی مسئله لری نینگ کنترول قیلیشی انچه مهم موضوع لردن ایدی، اما حاضر هیچ قنده ی ایشانچیمیز یوق که آیا بیزنینگ بو پیشنهاد لریمیز نی بو قانون گه نظرده آلگن میلر یا که آلمه گن لر."

سپین غر جنابلری، اگر ده مستقل سیلاولر کمیسیونی مدنی قوریلمه لر پیشنهاد لرینی نظرگه آلگن بولمسه، اولر بو موضوع نی عدلیه وزیرلیگی همده پارلمان گه چه هم تعقیب قیلیشی بیلن آگاه لنتیردی.

سیلاولر قانونی نیچه کون دن کیین، سیلاولر کمیسیونی نینگ رسمی ویب صحیفه سیده هم ترقه تیلیشی بیلگی لنگن.

اما بو قانون نینگ نیچه آی ایلگری ده گی مسوده سیده، جمهور لیک ریاستی نامزدی اوچون بیر ماده اوزگریش کیلگن.

بو اوزگریش انه بولردن عبارت:

جمهور لیک ریاستی نی ایگله ش اوچون اوزینی نامزد قیلگن شخص نینگ، جسمی و روانی سلامت لیگی بولیشی، مخدره ماده لرگه معتاد بولمه گنی، قانون سیز شکلده قورالی بولمه گنی، عصیانچی گروه لر، جنایت چیلر و جاسوس لر بیلن رابطه سی یوق لیگی اوستیده تاکید بولگن.

شونده ی بیر حالده، تحلیل چی اسدالله ولوالجی گه کوره، افغانستان سیلاولری قانونیگه هر قنچه اوزگریش لر هم کیلسه، مذکور کمیسیون اعضا لری بوتونلی اوزگرمسه، کیله سی سیلاولر ده انچه قلاب کارلیک یوز بیریشی ممکن لیگی نی ایته دی.

شو نینگ دیک افغانستان سیلاولر کمیسیونی، کیله سی سیلاولر اوچون دولت، مدنی قوریلمه لر و یاردم بیروچی تشکیلات لر تمانیدن حاضر دن تیارگر لیک آلیشی نی هم ایسته دی.

معنوی جنابلری شونده ی بیر حالده بو سوزلرنی یوریتماقده که، اوتگن جمهورلیک ریاستی و پارلمانی سیلاولریده انچه قلاب کارلیک لر یوز بیریب، بو سیلاولر انچه شخص لر و تشکیلات لر تمانیدن تنقید آستیده کیلگن ایدی.