هرات وقندوز ولایتلریده یوزبیرگن ناقرارلیکلرده کمیده آلتی پلیس هلاک بولگن

Image copyright AP

هرات ولایتی غوریان تومنی نینگ تروریزم گه قرشی کوره شیش آمری قوشیمچه اوچ پلیس طالبان پیستیرمه سیگه دوچ کیلیب هلاک بولگن. همده قندوزولایتیده یوزبیرگن پارتلشده ایککی پلیس قربان بولگن.

هرات ولایتی نینگ وقتینچه لیک پلیس باشلیغی، جنرال عبدالحمید حمیدی غوریان تومنی نینگ تروریزم گه قرشی کوره شیش آمری اوچ قوریقچیسی بیلن بیرگه هلاک بولگنینی تصدیق له گن.

عینی حالده او، پلیس گه قرشی هجوم قیلگن طالبان عصیانچی لری نینگ منطقه دن قاچیب کیتگنینی تاکیدلب حادثه یوزه سیدن تیکشروو ایشلر باشله تیلگنینی ایتگن.

طالبان عصیانچیلری حاضرگه قدر بو حادثه باره سیده هیچ قندی فکر بیلدیرگنی یوق.

هرات ولایتی گه تیگیشلی غوریان تومنی اوشبو ولایت نینگ تینچ ولسواللیک لریدن بیری ایدی لیکن سونگی پیتلرده محلی رسمیلر بو تومنده عصیانچیلیک فعالیت لری ارتیب باره یاتگنیدن خواطر بیلدیرگن.

شونینگ دیک ایریملر غیر مسوول قوراللی کیشی لر موجودلیگی هم ناتینچلیک لرگه سبب بولیب کیله یاتگنینی ایتیشماقده.

شونینگ دیک شمال شرقی قندوز ولایتیدن کیلگن خبرلرگه کوره، اوشبو ولایت مرکزیده گی حضرت سلطان منطقه سیده یول چیککه سیده اورنه تیلگن ماین پارتلش نتیجه سیده کمیده ایککی پلیس هلاک بولیب وینه اوچ پلیس یره لنگن.